Qostanai oblysynyń Áýliekól aýdanyndaǵy orman órti 10 qyrkúiekte tolyqtai sóndirildi, - dep habarlaidy Qostanai oblysynyń TJD baspasóz qyzmeti.
"2 qyrkúiekte saǵat 15:10-da Áýliekól aýdanynyń Basaman jáne Semiozer orman sharýashylyǵy basqarmalarynyń aýmaqtarynda aǵashtar men qurǵaq shópter órtengen bolatyn. Órt aýmaǵy - 43 myń gektar. Eki eldimekendegi 91 turǵyn úi janyp ketti. Evakýatsiialanǵandar úilerine oralyp, qalǵandary týystarynda qaldy. Órt bastalǵannan beri barlyǵy 2 091 adam evakýatsiialandy", - delingen habarlamada.
12 adam órt kezinde jeńil jáne ortasha aýyrlyqtaǵy jaraqattar, kúiikter alyp, ýlanǵan. Zardap shekken 3 adam Áýliekól aýdandyq aýrýhanada em qabyldap jatyr. 1935 jyly týǵan bir adam qaza tapty.
Jedel shtab jumysy bastalǵannan beri TJM jedel jelisine 38 qońyraý kelip tústi. 87 azamatqa konsýltatsiialyq-psihologiialyq kómek kórsetildi, 45 balamen toptyq psihologiialyq jumys júrgizildi.
Tikushaqtar áýeden 327 ret sý shashty. Órtti sóndirýge 1 785 adam jáne 207 birlik tehnikadan qurylǵan kúshter jáne quraldar jumyldyryldy. Oqiǵa ornynda Basaman jáne Semiozer orman sharýashylyǵy basqarmasy 73 adam jáne 21 birlik tehnikadan qurylǵan kúshteri men quraldary qaldy.
