A.Baitursynov atyndaǵy Qostanai memlekettik ýniversitetinde «Onomastikalyq jańǵyrý - rýhani jańǵyrý kepili» atty respýblikalyq ǵylymi-praktikalyq konferentsiia ótti, dep habarlaidy "Ult aqparat".
Konferentsiiaǵa Qostanai, Astana, Almaty, Pavlodar qalalarynyń tarihshy, filolog ǵalymdary men mamandary qatysty. Onomastika salasyndaǵy ǵylymi-pratikalyq máseleler jóninde baiandamalar jasalyp, pikir-oilar ortaǵa salyndy.
Filologiia ǵylymdarynyń kandidaty, elordalyq maman Jazira Aǵabekovanyń aitýynsha, «Rýhani jańǵyrý» baǵdarlamasyn júzege asyrýdaǵy ózekti másele - burmalanǵan, umyt qalǵan qazaqy ataýlardy qalpyna keltirý, tiriltý, sol arqyly tól tanymymyzdy oiatyp, qoǵamdyq sanany jańǵyrtý.
«Latyn qarpine kóshýge bel býǵan ult eń áýeli osy máseleni retke keltirip alýy kerek. Bizge sińisti bolyp ketken onomastika kirill qarpimen jasalǵandyqtan, birizdilikten ajyrap qalǵanymyz endi esimizge túsip jatqan siiaqty. Qazaqy ataýlardyń úndik ózgeriske ushyraýynan da bárimiz kóre tura kónip júrgen qatelikter kóp. Bul damyǵan memleketterdegidei elimizde onomastikalyq zańdy nusqaýlyqtardyń áli qalyptaspaǵanyn ańǵartady», - dedi ol.
Al, ýniversitet professory Qalqaman Jaqyp onomastikanyń jer men el tutastyǵynyń kepili ekenine toqtaldy. Ol konferentsiia saiyn burqyrap aitylyp jatatyn usynystyń eshqaisysy joǵarǵy jaqqa jetip, qaraýǵa alynyp, sheshimin taba bermeitinin de synǵa aldy.
Respýblikalyq mamandar jer-sý ataýlaryn jańǵyrtý turǵysynda ilgerileýshilik baiqalǵanymen, Qostanai oblysynyń áli de kenjelep turǵanyn jasyrmady.
Konferentsiia barysynda Ahańnyń 145 jyldyǵyna orai Aqkól aýylyna ult kóseminiń esimi berilgeni, Beiimbet Mailinniń 125 jyldyǵyna orai Taran aýdanyna atyn berý, Jeńis kúni qarsańynda oblys ortalyǵyndaǵy kóshelerdiń birin UOS ardageri qostanailyq Estai Eshanovtyń esimimen ataý usynystary qaralyp jatqany jariia etildi.
