Qostanai oblysynda barlyq ózen-kólde balyq aýlaýǵa ýaqytsha tyiym salyndy. Qostanai oblystyq orman sharýashylyǵy jáne janýarlar dúniesi aýmaqtyq inspektsiiasy reid sharalaryn júrgizýde, dep habarlaidy "Ult aqparat".
Oblystyq orman sharýashylyǵy jáne janýarlar dúniesi aýmaqtyq inspektsiiasynyń balyq sharýashylyǵy bólimi basshysy Tańat Smaiylovtyń aitýynsha, bul shara óńirdegi balyq qorlaryn tolyqtyrý úshin jasalyp otyr. Óitkeni, sýyq sýlarda tirshilik etetin balyqtar kúzde ýyldyryq shashyp, kóbeietin kezi. Sol sebepti tabiǵi túrdegi ósimin qalpyna keltirý mańyzdy.
«Osyǵan orai oblysta «Ýyldyryq shashý-2019» dástúrli naýqany júzege asyrylýda.Oblysta 20 qazannan bastap, qarasha aiynyń sońyna deiin sany az balyqtardy aýlaýǵa tyiym salynady. Máselen, aqsaqa (sig) tuqymdy balyqtar sirek kezdesedi jáne oblystyń ár aýdanynda tirshilik etedi. Sonymen qatar kásipshilik maqsatta da qarmaq salýǵa bolmaidy. Al Qaratomar sý qoimasy jáne Halvai aýylynan Aiat shahtasynyń bógetine deiingi aralyqtarda balyq aýlaý quraldaryn paidalanýǵa jyl sońyna deiin ruqsat etilmeidi. Turǵyndarǵa osyny eskertemiz. Búginge deiin 200-ge jýyq zań buzýshylyq anyqtalyp, brakonerlerge aiyppul salyndy», - deidi Tańat Smaiylov.
Osy kúni oblysta 805 sý aidyny bar. Olardyń 221-i balyq sharýashylyǵyna negizdelgen. Atalmysh ózenderdiń barlyǵynda balyq túrlerin kóbeitý maqsatynda jumystar bastaldy.
