kollaj: Ulysmedia.kz
Carytúbektegi Ahmet Baitursynulynyń kindik qany tamǵan úiiniń izi de qalmaǵan. Buǵan deiin turǵan berik irgetasyn merdigerler buzyp tastap, ornyna tez úgitiletin tas qalaǵan. Onyń ózinde qiiýyn keltirmei, jurttyń ashýyn týǵyzǵan. Al jergilikti biliktiń sózinshe, Ult ustazy buzylǵan úide dúniege kelmegen, dep habarlaidy «Habar 24».
"Bul arada Ahmettiń burynǵy úiiniń izi bolǵan. Fýndamenti qara shymnan, kesekten salynǵan edi. Mine, qarap otyrsańdar jobasy osy jerden. Mynaý arada peshpen bólingen edi. Sol peshpen bólingen buryshta ájemiz Ahmet atamyzdy dúniege ákeldi-aý dep ózimiz oilaityn edik. Astan-kesteni shyqqan. Izi de qalmaǵan, dymy da qalmaǵan. Ahmettiń ózimizde bar eń sońǵy eskertkishinen aiyrylyp qalyp turmyz" - deidi Ahmet Baitursynuly aýylynyń turǵyny Jaqsybek Ábdisalyq.
"Jermen-jeksen bolǵan aýmaqta byltyr eki bólmeli úi turǵan. Ult ustazy Sarytúbektegi osy baspanada dúniege keldi", deidi jurt. Turǵyndar ony eskertkish retinde 2009 jyly bastapqy keipindegi irgetastyń ústine salǵan.
Osylaisha, aimaq taǵy bir kieli nysannan aiyryldy. Týra bir ai buryn Ahmet Baitursynuly týǵan úi tolyq buzyldy. Biyl Alash arysynyń 150 jyldyq mereitoiy desek, maqtan tutarlyq eshqandai eskertkish qalmaǵan.
Telearna málimetinshe, biyl mamyr aiynda úi qaita jańǵyrtylady dep sheshildi. Tender jariialanyp, merdiger jumysqa kirisken. Biraq 22 mln teńgeniń qurylysy orta jolda toqtap qaldy. Nysanda sapasyz materialdar paidalanǵany týraly videolar áleýmettik jelige tarap, daý shyqty. Qabyrǵasyna degen qum bloktary kópke shydaýy ekitalai edi.
Jaýapsyz merdigermen kelisim eki jaqpen úzilgen. Oǵan bir tiyn da tólenbegendikten is sotqa jetpeitin boldy.
"Saman kirpishten qaita quiylǵan úi. Bylaisha aitqanda kóriksiz, zaman talabyna sáikes kelmeitin, ári qarai qalpyna keltirýge múmkindigi joq úi bolatyn. Ol dál Ahmet Baitursynulynyń týǵan úii emes. Sonyń irgesiniń negizinde kóterilgen úi. Úlkenderdiń aitýynsha, aýyl adamdarynyń aitýy boiynsha qalanǵan úi. Sondyqtan biz ony bylaisha aitqan kezde Ahmet Baitursynovtyń týǵan úii jer betinen ysyrylyp tastady deýge kelmeidi. Tarihi shyndyqqa janaspaidy" - deidi mádeniet basqarmasynyń basshysy Erlan Qalmaqov.
Qazir súrilgen aýmaq tegistelip jatyr. Jańa úidiń qurylysy jobalanyp qoiǵan. Qyrkúiekke deiin salynyp bitýi tiis.
"Joba boiynsha 149 sharshy metr. Turǵyn úidi mýzei úi etip, qaita qalpyna keltirý jumystaryn júrgizedi. Jobasy 20 maýsymda alynady. PSD-ny jobalaýǵa 1,2 mln teńge demeýshiler atynan isteledi. Al endi úidiń quny 37 mln bop tur. Ekspertizaǵa deiin. Endi ol ózgelerdi áli" - deidi Jangeldin aýdany qurylys bóliminiń basshysy Ádilbek Imanǵaliev.
"Qulaǵan zat qaityp turmaidy ǵoi. Qansha zarlaǵanymen ol qaityp kelmeidi. Endigi salatyn adam durystap salsa, kórneki qylyp. Bólingen aqsha az emes" - deidi Aqkól aýylynyń turǵyny Kádirjan Bóribaiuly.
Al Ahmetke arnalǵan kesene kerisinshe sapaly, ári qymbat Jańaózennen ákelingen temirtastan salynyp jatyr. Aqkól men Ahmet aýyly halqynyń bastamasymen 10 mln teńgege eki aptadan keiin turǵyzylyp bitedi. Alystan kóz tartatyn nysannyń aýmaǵy 70 sharshy metr bolady. Biiktigi 7 metrden asady.
