Nur Otan partiiasy ótkizgen praimeriz jeńimpazdarynyń biri Qosshydaǵy jaryq máselesin jeke baqylaýyna aldy, dep habarlaidy "Ult aqparat" partiianyń baspasóz qyzmetine silteme jasap.
Aita ketsek, jaqynda Qosshydaǵy «Altyn orda» jáne «Diamand» turǵyn úi keshenderinde jaryqtyń sónip, tariftiń kóterilýine bailanysty halyq aýyldaǵy Respýblika kóshesin jaýyp, narazylyq bildirgen bolatyn. Ondaǵy halyq atalǵan turǵyn úi keshenderinde jaryqty kilovatyna 26,7 teńgeden tólep jatqanyna narazy. Osynyń saldarynan bir úidiń ózinde jaryq tarifiniń ailyq tólemi 10 myń teńgeden asyp ketken. Odan bólek jaryqtyń jii sónip qalýy da azamattardyń ábden mazasyn ketirgen. Sebebi atalmysh turǵyn úilerdegi jylý batareiasy da toqqa qosylǵan. Kóbiniń balalary qashyqtan oqyp jatyr.
Bul máseleni retteý úshin «Nur Otan» partiiasy ótkizgen aimaqtyq praimerizdiń jeńimpazy Pavel Bezverbnyi Tselinograd aýdanynyń partiialyq komissiiasymen birge otyrys ótkizgen. Otyrystyń qorytyndysy boiynsha máseleni qadaǵalai almaǵany úshin Tselinograd aýdany ákiminiń orynbasary Qanat Aǵzamuly «sógis» túrindegi partiialyq jaýapkershilikke tartylǵan.
Sonymen qatar aýdandyq ákimdikke atalmysh turǵyn úilerdiń ár turǵynymen «AREK» JShS arasyndaǵy kelisimshartty jasaý jumysyn osy jyldyń 25 qarashasyna deiin retteýge keńes berilip otyr.
«Atalmysh másele partiianyń oblystyq filialynyń nazarynda», - dep sendiredi partiianyń baspasóz qyzmetinen.
