QR IIM Tótenshe jaǵdailar komitetiniń tóraǵasy Vladimir Bekker Qosshydaǵy aýyz máselesiniń sheshilgenin málimdedi. Burynǵy uńǵymalardy áli iske qosqan joq. Sonyń ornyna birneshe uńǵymany qazyp alýǵa týra keldi, dep xabarlaidy QazAqparat tilshisi.
Komitet basshysynyń aitýynsha, jańadan tórt uńǵyma qazyldy. Qazirgi kezde úsheýi iske qosyldy. Al sý baspaǵan alty uńǵymamen birge qosqanda barlyǵy toǵyz uńǵyma istep tur.
«Sonyń arqasynda kópqabatty úilerge aýyz sý tolyǵymen berildi. Budan bólek, 772 jeke úide sý bar. Endi, taǵy 670 jeke úi qalyp otyr. Maǵan túsken aqparatqa sáikes, jańadan qazylǵan tórt uńǵymanyń bireýi búgin iske qosylady. Sonyń arqasynda qalǵan jeke úilerge aýyz sý beriledi», - dedi V.Bekker elordada ótken baspasóz máslixatynda.
Aita keteiik, ótken aptada QR Prezidenti Qasym-Jomart Toqaev elordaǵa jaqyn Qosshy aýylynyń aýyz sý máselesin shuǵyl sheshýdi tapsyrǵan edi.
Buǵan deiin TJK basshysy Vladimir Bekker ol jerdegi jaǵdaidyń mán-jaiyn túsindirgen bolatyn. Onyń sózine qaraǵanda, sý basqan uńǵymalardy iske qosý múmkin emes. Sýdyń ketkenin kútý kerek. Jergilikti ákimdik súńgýir mamandardy da shaqyrdy. Biraq komitet olardy jibermeýge sheshim qabyldady. Sebebi adam ómirine qaýip bar. Biraq komitet basshysy Qosshynyń aýyz sý máselesi úsh-tórt kúnde sheshiledi dep aitqan.
Sondai-aq, búgingi QR IIM Tótenshe jaǵdailar komitetiniń tóraǵasy tasqyn sý qorshaýynda qalǵan aýyldyń jaǵdaiy týraly aityp berdi.
«Keshe, 14 sáýir kúni tas joldan Eski Kolýton aýylyna baratyn jol ýchaskesi jóndeldi. Búginde avtokólik qozǵalysy ashyldy. Al Kolýton ózeniniń deńgeii tómendep keledi», - dedi V.Bekker.
