QR Indýstriia jáne infraqurylymdyq damý ministri Roman Skliardyń el aldyndaǵy eseptik kezdesýinde Nur-Sultan qalasynyń irgesindegi Qosshy aýylyn sýmen qamtamasyz etý máselesi kóterildi, dep habarlaidy QazAqparat tilshisi.
Kent turǵyny kópqabatty úilerde sýdyń berilýi árkelki ekenin aityp, bul máseleniń qashan túbegeili sheshiletinin surady. Aýyl turǵynynyń suraǵyna jaýap bergen qurylys komitetiniń tóraǵasy Marhabat Jaiymbetov sońǵy jyldary aýyldyń halqy jyldam ósip kele jatqanyn aitty.
«Sońǵy 5 jylda Qosshy eldi mekeniniń halqy 2 ese kóbeiip, 50 myńǵa jetti. Iaǵni táýligine 10 myń tekshe metr sý qajet. Al múmkindik táýlik saiyn 4,5 myń tekshe metr sý berýge jetedi. Sondyqtan, ministrlik sońǵy eki jylda bul máseleni sheshý úshin 2 mlrd teńge bólgen bolatyn. Ol qarjyǵa 14 uńǵyma qazylyp, 6 shaqyrym qubyr tóseldi. Sý tazartqysh nysan da salyndy. Al biyl Ulttyq ekonomika ministri 513 mln teńge bóldi. Osynyń arqasynda jyl sońyna deiin Qosshy eldi mekenin sapaly aýyz sýmen qamtamasyz etý máselesi sheshiledi degen josparymyz bar», - dedi Marhabat Jaiymbetov.
