«Qoshqar men Tekege» teńge jete me?

Sońǵy jyldary ekranǵa shyqqan qazaq mýltfilmderiniń ishinde «Qoshqar men Teke» á degennen-aq kórermenderdiń ystyq yqylasyna ie bolǵany anyq. Qashanda shetel mýltfilmine qumartyp, Shrek, Órmekshi adam, Spandjbob dese ishken asyn jerge qoiatyn qazaq balalaryn lezde baýrap alyp, kishkentailardyń qoshqar bop alysyp-julysyp júrgenine talai kýá boldyq.

Degenmen de qazaqy bolmysqa jaqyn, ásirese, jas kórermenderdi kúlkige bólep, kóptep jinai bilgen «Qoshqar men Tekeniń» bar-joǵy eki-aq seriiasy shyqty. Tipti, aýyz toltyryp aitýdyń ózi uiat… Mundai kezde shetel mýltfilmderi serial-serial bop túsirilip, sońy kórinbei, ubap-shubap keter edi. Jap-jaqsy tabylǵan personajdardyń nebári eki-aq seriiamen shektelip qalýyna ne sebep?

– Shynynda «Qoshqar men Tekeni» jurt óte jaqsy qabyldady, – deidi bizben áńgimesinde «Saq» kinostýdiiasynyń rejisseri Batyrhan Dáýrenbekov. – Eńbegimiz baǵalanyp, bul mýlt­film Qytaida arnaiy júldemen de marapattaldy. Elimizdegi osy salany saraptaýshy mamandar «Qoshqar men Tekeni» eń úzdik 5 mýltfilmniń biri retinde baǵalady. Aitpaqshy, úzdik dep baǵalanǵan osy beseýdiń úsheýi bizdiń «Saq» kinostýdiiasynyń ónimderi. Bul da bizdiń sapaly eńbegimizdiń aiqyn bir kórinisi bolsa kerek. «Qoshqar men Tekeniń» eki seriiasy «Qazaqfilmniń» tapsyrysy boiynsha túsirildi. Qarjysyn sol mekeme tóledi. Qazir úshinshi seriiasynyń stsenariii jazylyp, daiyn tur. Bul seriia aldyńǵylardan da qyzyqty bolatynyna senimim mol. Óitkeni, qoshqar, teke, qasqyrlardan da bólek personajdar qosylǵan. Biraq, osy seriiany túsirýge qarjy bolmai tur. Ázirge demeýshilerge habarlasyp, usynys aitqanymyz joq. Degenmen de bul iske qoldaý bolmasa, stsenarii tartpada jatyp, óz mańyzyn joǵaltyp ala ma degen de qaýpimiz bar.

Iá, elimizde mýltfilm óndirisiniń áli de aiaqqa tura almai jatqany týraly talai márte jazyldy. Áitse de tapqyrlyǵy men sheberligi arqasynda jurtty moiyndatyp, ulttyń bitim-bolmysyn, tynys-tirshiligin ekran arqyly jarqyratyp júrgen bul ónerli ujymǵa Mádeniet jáne sport ministrligi tarapynan úlken qoldaý kerek siiaqty.

Oralhan DÁÝIT,

«Egemen Qazaqstan»