Qazaqstan Respýblikasynyń Memlekettik hatshysy Qyrymbek Kósherbaev Almaty oblysyna jumys saparymen bardy, dep habarlaidy Aqorda.
Memlekettik hatshy «Rýhani jańǵyrý» baǵdarlamasynyń Almaty oblysynda júzege asyrylýy jáne jyr alyby Jambyl Jabaevtyń 175 jyldyq mereitoiyn merekeleýge daiyndyq barysymen tanysty.
Sapar barysynda Memlekettik hatshy Qarasai jáne Jambyl aýdandaryndaǵy birqatar áleýmettik-mádeni nysandardy aralady.
Atap aitsaq, Qyrymbek Kósherbaev Qazaqstan Respýblikasy Tuńǵysh Prezidenti – Elbasynyń «Atameken» tarihi-mádeni ortalyǵyndaǵy Tuńǵysh Prezident – Elbasy Nursultan Nazarbaevtyń Qazaqstannyń táýelsizdik alýyndaǵy jáne qalyptasýyndaǵy tarihi rólin aishyqtaityn mýzeilik ekspozitsiialarmen tanysty.
Sondai-aq, Memlekettik hatshy «Rýhani jańǵyrý» baǵdarlamasy boiynsha «Týǵan jer» jobasynyń aiasynda boi kótergen «Úshqońyr» dene shynyqtyrý-saýyqtyrý kesheninde boldy.
Sonymen qatar Qyrymbek Kósherbaev Jambyl Jabaevtyń ádebi-memorialdy mýzeiine baryp, Jambyl men onyń ónerdegi piri Súiinbai Aronulynyń, kompozitor ári dirijer Nurǵisa Tilendievtiń zirattaryna gúl shoqtaryn qoidy, mádeniet salasynyń ókilderimen kezdesti.
QR Mádeniet jáne sport ministri Aqtoty Raiymqulova, Almaty oblysynyń ákimi Amandyq Batalov, Almaty qalasynyń ákimi Baqytjan Saǵyntaev, Jazýshylar odaǵynyń tóraǵasy Ulyqbek Esdáýletov uly jyraýdyń 175 jyldyǵyna arnalǵan mereitoilyq is-sharalar josparyn tanystyrdy.
Mereitoilyq is-sharalar josparynda Jambyl týraly ómirbaiandyq filmniń túsirilimi, aqyn týraly kitaptar shyǵarý, aqyndar aitysyn uiymdastyrý, mádeni eskertkishter ornatý, sýretshilerdiń halyqaralyq plenerin ótkizý jáne t.b. sharalar qarastyrylǵan.
Kórnekti tulǵalardyń asyl muralaryn nasihattaý rýhani jańǵyrýǵa, ásirese, jastardyń rýhani ósýine zor yqpal etetini airyqsha atap ótildi.
