M.V.Lomonosov atyndaǵy Máskeý memlekettik ýniversitetiniń Qazaqstandaǵy filialynyń 20 jyldyq mereitoiyna arnalǵan saltanatty jiyn ótti, dep habarlaidy Aqordanyń baspasóz qyzmeti.
Oǵan Memlekettik hatshy Q.E.Kósherbaev qatysyp, QR Tuńǵysh Prezidenti – Elbasy N.Á.Nazarbaevtyń, Memleket basshysy Q.K.Toqaevtyń joǵarǵy oqý ornynyń mereitoiyna orai joldaǵan quttyqtaý jedelhattaryn oqyp berdi.
Qatysýshylar aldynda sóz sóilegen Memlekettik hatshy oqý ordasynyń mereitoiy Qazaqstan Respýblikasy Táýelsizdiginiń 30 jyldyǵymen tuspa-tus kelip otyrǵanyn atap, ýniversitet filialy Elbasy N.Á.Nazarbaevtyń bastamasymen ashylǵanyn aitty.
– Máskeý memlekettik ýniversitetiniń alǵashqy sheteldik filialynyń elimizdiń elordasynda ashylýy Qazaqstan men Resei arasyndaǵy dostyq bailanystyń jarqyn ári erekshe ekeniniń dáleli. Osynyń arqasynda buǵan deiin uzaq jyldar boiy qalyptasqan eki el arasyndaǵy ǵylym men bilim salasyndaǵy bailanys jańasha serpin aldy, – dedi Kósherbaev.
Sondai-aq Qyrymbek Kósherbaev QR Prezidenti Q.K.Toqaevtyń tapsyrmasymen M.V.Lomonosov atyndaǵy MMÝ filialyna el Úkimetiniń sheshimimen jańa ǵimarat berilgenin jetkizdi. Bul eńbek naryǵyna qajetti mamandarqataryn arttyryp, joǵary dárejeli kadrlar daiyndaýǵa múmkindik beredi.
Búgingi tańda qazaqstandyq filial Máskeý memlekettik ýniversitetiniń joǵarǵy bedelin saqtap, elimizdiń bilim jáne ǵylym salasynyń damýyna aitarlyqtai úles qosyp keledi. Filial qurylǵan 20 jyl ishinde álemniń aldyńǵy deńgeili oqý oryndarynyń standarttaryna sai irgeli bilimge ie 2 myńnan astam maman daiarlady.
