Májiliste sý salasyn damytý máseleleri boiynsha parlamenttik tyńdaý ótkizilip jatyr, dep habarlaidy Ulysmedia.kz.
Jiynǵa úkimet músheleri shaqyrylǵan. Premer-ministrdiń orynbasary Eraly Toǵjanov pen Ekologiia, geologiia jáne tabiǵi resýrstar ministri Serikqali Brekeshov salaǵa bailanysty baiandama jasap jatyr. Olardyń aldynda sóz sóilegen májilis tóraǵasy Erlan Qoshanov BUU baǵalaýy boiynsha álemde árbir besinshi turǵyn sýdyń tapshylyǵyn kórip otyrǵanyn málim etti.
«Kezinde BUU bas hatshysy bolashaqta sý munaidan da qymbat bolady degen sózi búgingi kúni shyndyqqa ainalyp otyr. Endi sarapshylardyń pikirine sáikes jyl saiyn adamzattyń sý resýrsyna qajettiligi shamamen 1 paiyzǵa artady. Kez kelgen memlekettiń áleýmettik-ekonomikalyq damýy men ulttyq qaýipiszdigi sý resrýstarymen tolyq qamtamasyz etilýine tikelei bailanysty», - dedi Qoshanov.
Onyń aitýyna qaraǵanda, memleket basshysy Qasym-Jomart Toqaev elimizdiń sý resýrstaryn paidalaný tiimdiligin arttyrý jáne qorǵaý – memlekettiń basym mindeti ekenin birneshe ret atap ótken. Halyqaralyq sarapshylardyń aitýynsha, 2040 jylǵa qarai Qazaqstanda sý tutyný 46 paiyzǵa artady. Al sý resýrstarynyń tapshylyǵy jylyna 12 tekshe shaqyrymǵa jetýi múmkin. Buǵan áser etýshi faktorlar jeterlik.
«Halyq sanynyń ósýi, ekonomikalyq damýdaǵy erekshelikter men basqa da sebepter yqpal etip otyr», - dedi Qoshanov Májilistegi parlamenttik tyńdaý barysynda.
Osy oraida ol ónerkásip jáne turmystyq sektorda sý tutyný jyl saiyn artyp kele jatqanyn málim etti.
«Aýyl sharýashylyǵy sýdy eń kóp tutynatyn sala bolyp otyr. Árine, memleket tarapynan tiisti sharalar qabyldanyp jatyr. Biraq sý resýrstarynyń máselesi áli de ózekti. Solardyń keibireýine toqtalyp ótsem. Birinshiden, Memleket basshysy byltyrǵy Joldaýynda bes jylda qalalar men aýyldardy 100 paiyz aýyzsýmen qamtamasyz etý mindetin júktedi. Biraq áli 1 543 aýyl nemese 544 myń adam taza sýmen qamtamasyz etilmegen. Demek, bul baǵyttaǵy jumysty áli de kúsheitý qajet. Keibir oblystarda bul baǵytta tiisti jumystardy atqarý kerek», - dedi Erlan Qoshanov.
