Koronavirýstyń tórtinshi tolqyny áli aiaqtalǵan joq. Bul týraly onlain brifing barysynda S. Asfendiiarov atyndaǵy QazUMÝ alǵashqy meditsinalyq-sanitarlyq kómek bóliminiń meńgerýshisi Dinara Mahanbetqulova málim etti, dep habarlaidy QazAqparat.
«Tórtinshi tolqyn áli aiaqtalǵan joq. Antidenelerdiń joǵary titri bolǵan jaǵdaida ujymdyq immýnitet qalyptaspaiynsha, epidemiologiialyq ahýal jaqsarmaidy», - dedi Dinara Mahanbetqulova.
Spikerdiń sózinshe, vaktsina qazirgi ýaqytta taralyp jatqan koronavirýstyń barlyq shtammdarynan qorǵanýǵa kómektesedi. Sonymen qatar, virýsqa qarsy ári turaqty immýnitet paida bolady.
«Aýrýdan keiin qalyptasatyn tabiǵi immýnitettiń kúshi adamdarda ártúrli. Tabiǵi immýnitet uzaq saqtalmaýy múmkin. Vaktsinatsiia arqyly immýnitettiń damýy onyń tabiǵi paida bolýyna qaraǵanda az táýekelge ie, óitkeni COVID-19 juqtyrǵan kezde simptomdardyń aýyrlyǵyn boljaý múmkin emes», - deidi ol.
S.D. Asfendiiarova atyndaǵy QazUMÝ alǵashqy meditsinalyq-sanitarlyq kómek kafedrasynyń meńgerýshisi koronavirýs jaǵdaiynda bilikti meditsinalyq kómekke der kezinde júginý óte mańyzdy ekenin aitty.
« Koronavirýs infektsiiasynyń belgileri týraly aitatyn bolsaq, joǵary temperatýra, entigý, túshkirý, jótel men murynnyń bitelýi, bulshyqet pen keýde tusynyń aýyrýy, bas aýrýy men álsizdik. Jaqynda joǵaryda atalǵan belgiler júrek ainýy, qusý jáne diareia siiaqty belgilermen tolyqty», - deidi dáriger.
