Qazaqstan koronavirýs infektsiiasynyń ekinshi tolqyny úshin meditsinalyq jabdyqtar satyp alýda. Qazir 185 meditsinalyq uiymnyń 132-si ǵana rentgendik diagnostikalyq apparattarmen qamtamasyz etilgen, 2020 jyldyń qazanyna deiin olar 100% jabdyqtalady, dep habarlaidy QazAqparat.
QR Densaýlyq saqtaý ministrligi jergilikti atqarýshy organdarmen birlesip, koronavirýstyq infektsiianyń ekinshi tolqynyna daiyndyq sharalaryn iske asyryp jatyr.
Vedomstvonyń habarlaýynsha, qazirgi ýaqytta 185 meditsinalyq uiymnyń 132-si rentgendik diagnostikalyq keshendermen qamtylǵan. 2020 jyldyń qazanyna deiin halyqtyń qajettilikterin qanaǵattandyrý úshin taǵy 53 rentgen apparaty satyp alynady jáne jetkiziledi. Bul aýrýhanalar men emhanalardy qajetti jabdyqtarmen 100% qamtýǵa múmkindik beredi.
Odan bólek, biylǵy qazan aiyna qarai óńirlerdegi aýyldarǵa 100 jyljymaly meditsinalyq keshen jetkiziledi. Olar rentgen apparattarymen, ÝDZ, EKG jáne ginekologiialyq tekserý qurylǵylarymen jabdyqtalady.
«Aýrýhanalardyń qajettiligin qamtamasyz etý úshin 23 890 tósek-orynǵa ottegi satyp alý jumystary júrýde. Sondai-aq, 2 578 ókpeni jasandy jeldetý apparaty alynyp jatyr, onyń 1500-i qazaqstanda jasalǵan, 1 078-i jergilikti biýdjet pen demeýshilik kómek esebinen alynǵan. Qazirgi ýaqytta meditsinalyq uiymdarda 1 958 ókpeni jasandy jeldetý apparaty bar», - dep túsindirdi ministrlik.
Jedel jáne shuǵyl meditsinalyq kómekpen qamtamasyz etý maqsatynda Qazaqstanda jasalǵan 1 967 sanitarlyq kólik satyp alyndy. Taǵy 360 kólik otandyq taýar óndirýshilerden lizing aiasynda satyp alynady.
Sonymen birge, elimizde 13 juqpaly aýrýlar aýrýhanasy salynyp jatyr, olar da 2020 jyldyń qazanyna qarai qoldanysqa berilýi tiis. Nátijesinde Qazaqstanda barlyq halyqaralyq standarttarǵa sai keletin 16 jańa aýrýhana jumys istemek.
