Qytai qazir 2019 jyldyń aiaǵynda elde koronavirýs alǵash ret anyqtalǵannan bergi kezeńde osy indettiń eń aýqymdy túrde qaita órshýin baqylaýda ustaý úshin jan-jaqty shara qoldanyp jatyr.
6 tamyzda bul elde koronavirýstyń adamnan adamǵa juǵyp taraǵan 80 jaity tirkelgen. Onyń 58-i shyǵystaǵy Ianchjoý qalasynda anyqtalǵan. Munda koronavirýstyń "Delta" varianty áýeli Nankindegi áýejai qyzmetkerlerine juǵyp, keiin jurt arasynda tarai bastaǵan. Qazir virýstyń bul túri Hainannan bastap Reseimen shekaralas Ishki Mońǵoliia avtonomiialyq aýdanyna deiingi aýmaqty qamtityn alty provintsiiada anyqtalyp otyr. Úkimet ahýalǵa bailanysty jalpy shekteý engizý, jappai testileý jáne adamdardyń sapar shegýine shekteý qoiý arqyly virýsty aýyzdyqtaýǵa tyrysyp jatyr.
Qazir Qytai tárizdi basqa da birqatar elde "Delta" varianty qarqyndy túrde tarap otyr.
- Indet órshi bastaǵan soń Ońtústik Koreia Úlken Seýl aýmaǵynda engizilgen áleýmettik araqashyqtyq saqtaý erejesin taǵy eki aptaǵa uzartýǵa májbúr boldy.
- AQSh-ta virýsty jańadan juqtyrǵandar sany keiingi alty ai merzim ishindegi rekordtyq deńgeige jetti – 4 tamyzda elde 100 myńnan astam naýqas anyqtalǵan. Sheneýnikter "Delta" varianty ásirese vaktsinatsiialaý deńgeii tómen shtattarda lań salyp jatqanyn aitady.
- Avstraliia sheneýnikteri 6 tamyzda Sidnei halqyna indettiń órshýine daiyn bolýdy eskertken. Bilik qalada birneshe aptadan beri shekteý engizilip otyrǵanyna qaramastan, ekinshi kún qatarynan infektsiia juqtyrýdyń rekordtyq kórsetkishi tirkelgennen keiin osyndai málimdeme jasady.
Amerikalyq Djons Hopkins ýniversitetiniń dereginshe, indet bastalǵaly beri álemde 200 mln-nan astam adamǵa koronavirýs juqqan, 4 mln adam qaitys bolǵan.
2019 jylǵy jeltoqsanda Qytaidyń Ýhan qalasynda taralǵan SARS-CoV-2 virýsynyń (Conid-19) shyqqan tegi, onyń adamdarǵa juǵyp, taralýy týraly bir-birine kereǵar pikir kóp.
Dúniejúzilik densaýlyq saqtaý uiymynyń basshysy Tedros Adhanom Gebreiesýs koronavirýs infektsiiasy Ýhandaǵy zerthanadan tarady degen nusqany joqqa shyǵarýǵa bolmaidy dep, Qytaidan bul máseleni zertteýde ashyq bolýyn suraǵan.
Osy aptada CNN arnasy AQSh barlaý agenttikteri Ýhandaǵy virýsologiia institýtynda zerttelgen virýs úlgileriniń bazasyna qol jetkizgenin habarlady. Basylymynyń aitýynsha, tyń derekter virýs zerthanadan tarady degen boljamdy zertteýge múmkindik beredi.
Qytai asa qaterli virýstyń Ýhan zerthanasynan taraǵan bolýy múmkin degen boljamdy úzildi-kesildi joqqa shyǵaryp, ony "saiasi haip" dep ataǵan.
