Koronavirýstyń almatylyq shtamy degen virýs joq. Bul týraly Biologiialyq qaýipsizdik máselelerin ǵylymi-zertteý institýtynyń zerthana meńgerýshisi, PhD doktory Erbol Borashev málimdedi, dep habarlaidy QazAqparat.
«Osydan on kún buryn COVID-19-dyń oń úlgilerin alǵanymyz ras. Zertteýler nátijesinde britandyq tiptegi koronavirýstyq infektsiianyń jańa nusqasyna jatatyn shtamm tabyldy. Qazirgi ýaqytta onyń virýsyn bólý boiynsha tereń zertteýler júrgizilýde. Anyqtalǵan koronavirýs shtamy Eýropada, AQSh-ta taraǵan britandyq shtamǵa sáikes keledi. Basqasha aitqanda, jańa almatylyq shtamm degen joq. Iaǵni biz zerttep jatqan shtamm – jeltoqsan aiynyń aiaǵynan beri álemde keńinen taralyp jatqan shtamm. Bizde ol endi ǵana tirkelip jatyr», - dep túsindirdi Erbol Borashev agenttik tilshisine telefon arqyly bergen málimetinde.
Ol, sondai-aq, anyqtalǵan koronavirýs shtamynyń erekshelikteri týraly aitty.
«Basqa shtamdardan aiyrmashylyǵy, ol óte juqpaly jáne tigizetin zalaly aýyr. Sondyqtan ol búkil álemge tez tarap jatyr. Iaǵni, burynǵy shtamdardan da juqpaly, onyń ústine aǵzaǵa tigizer áseri áli tolyq zerttelmegen», - deidi Erbol Borashev.
Sarapshy pandemiianyń beti qaitpai turǵanyn, aýrýdyń qozdyrǵyshtary men genetikalyq qasietteri ózgerýge óte beiim ekenin aitady. Sheteldik ǵalymdardyń zertteýlerine sáikes, SARS-CoV-2 virýsy kóptegen tabiǵi joldardan ótip, genomy genetikalyq ózgeristerge ushyraǵan. COVID-19 qozdyrǵyshynyń «britandyq» jáne «ońtústikafrikalyq» shtamdary osylai paida bolǵan.
Halyqaralyq GISAID derekter bazasynyń málimeti boiynsha, atalmysh klaid G mýtatsiiasy jer betiniń barlyq núktesine jetken.
