«MedLain» meditsinalyq ortalyǵynyń pýlmonolog dárigeri, meditsina ǵylymdarynyń kandidaty Konstantin Garkalov Qazaqstandaǵy COVID-19 jaǵdaiy jóninde óz boljamdaryn aitty, dep habarlaidy QazAqparat.
Pýlmonolog koronavirýstyń sýyqqa qalai áser etetinin túsindirdi jáne COVID-19 kelesi tolqynynyń qalai ótetini týraly pikirin bildirdi.
«Sýyqtyń ózi koronavirýs infektsiiasynyń taralýyna esh áser etpeidi. Biz Resei men Eýropada koronavirýstyń jazda jáne qysta birdei tez taralatynyn kórip otyrmyz. Koronavirýstyń ekinshi tolqynyna kelsek, ǵalymdar koronavirýstyń taralýynyń birneshe nusqasyn modeldep kórdi. Birinshisi – jazyqtaǵy tóbeler, iaǵni azdap kóteriledi, sosyn jaǵdai turaqtanady, sodan keiin qaitadan kóteriledi. Ekinshisi – kishkentai ózgerister bolatyn baiaý sheńber, al úshinshi nusqa – úlken daýyl, iaǵni jappai juqtyrý bolady, kúrt tómendeidi, sodan keiin aýrýdyń tómen deńgeii qalady», - dedi K. Garkalov QazAqparat tilshisine bergen suhbatynda.
Onyń aitýynsha, Qazaqstanda koronavirýstyń taralýynyń úshinshi nusqasy baiqaldy.
«Endi shilde aiyndaǵydai juqtyrý sany kóp bolmaidy dep oilaimyn. Árine, koronavirýs infektsiiasy eshqaida ketpedi, áli aýyrmaǵan adamdar bar. Biraq maýsym-shilde ailarynda bolǵan ekinshi tolqyn endi bolmaidy dep oilaimyn. Birinshi tolqynnyń tájiribesi bar jáne densaýlyq saqtaý júiesi tyńǵylyqty daiyndaldy. Ekinshiden, qazir halyq virýstyń qaýpin burynǵydan da jaqsy túsinedi jáne saqtaný sharalaryn jasaidy. Úshinshiden, qazir jazda aýyrmaǵandar aýyrýy múmkin. Al kópshiligi jazda aýyryp qoiǵan edi», - deidi pýlmonolog.
Sonymen birge, dáriger koronavirýspen qaita aýyrý jaǵdailaryn muqiiat zerttep, dáleldeý qajettigin aitty.
«Dúniejúzilik densaýlyq saqtaý uiymy koronavirýsty qaita juqtyrý jaǵdaiyn resmi rastaǵan joq. Biraq DDU janynan osy jaǵdailardy zertteitin ǵalymdardyń arnaiy toby quryldy. Qytaidaǵy bir patsientte PTR synamasy úsh ai boiy oń nátije kórsetip keldi. Oǵan ár apta saiyn zertteý júrgizildi. Munda shyryshty qabatta qalǵan virýs bólikteri testke reaktsiia jasady degen dálelder bar. Negizi naýqas klinikalyq túrde jazylǵan, biraq PTR testi oń nátije kórsete bergen. Bul óte qiyn másele, munda juqtyrýdyń shynymen qaitalanǵanyn dáleldeý kerek. Ulybritaniia ǵalymdarynyń immýnitet bir jylǵa, tipti keibir adamdarda úsh jylǵa sozylýy kerek degen zertteýleri bar. Eger antideneler bolsa, olar jumys isteýi kerek», - deidi maman.
Sonda da dáriger qarapaiym virýstan qorǵaný joldaryn ustanýǵa shaqyrdy.
«Árine, qorǵanys quraldaryn paidalaný kerek. Maska taǵyp, áleýmettik qashyqtyqty saqtańyz, qolyńyzdy sabynmen jii jáne muqiiat jýyńyz. Jaqsy uiqy, taza aýada serýendeý, jaqsy kóńil-kúi immýnitettiń kúsheiýine yqpal etedi», - dep tolyqtyrdy Konstantin Garkalov.
