«Qazaq onkologiia jáne radiologiia ǵylymi-zertteý institýty» AQ basqarma tóraiymy Diliara Qaidarova ótken jyldyń naýryzynan beri onkologiialyq aýrý bar qansha adamnyń koronavirýstan qaitys bolǵanyn aitty, dep habarlaidy QazAqparat.
«Ótken jyldyń naýryzynan beri shamamen 5 600 onkologiialyq aýrýy bar naýqas COVID-19-ǵa shaldyqty jáne osy kezeń ishinde shamamen 45-i qaitys boldy», - dedi Diliara Qaidarova Ortalyq kommýnikatsiialar qyzmetindegi baspasóz máslihatynda.
Onkologiialyq naýqastardyń elektrondyq tirkeliminiń derekterine sáikes, qaterli isikterden bolatyn ólim-jitim kórsetkishi 2020 jyly 100 myń turǵynǵa shaqqanda 75,5 nemese 14 150 jaǵdai boldy. Ólim-jitimniń tómendeýi 0,7 paiyzdy qurady. Ólim-jitim qurylymynda birinshi orynda ókpe obyry, odan keiin asqazan obyry, kolorektaldy qaterli isik pen sút bezi obyry tur.
«2020 jyly onkologiialyq naýqastar kontingenti 190 159 adamdy qurady. Onkologiialyq aýrýlar qurylymynda birinshi orynda sút bezi obyry - 13,2, ekinshi orynda ókpe obyry – 10,4, úshinshi orynda kolorektaldy qaterli isik - 9,6 paiyz bolyp otyr. Aýyrǵandardyń 56 paiyzy eńbekke qabiletti jasta», - dedi D.Qaidarova.
