Qazaqstannyń Densaýlyq saqtaý ministrligi koronavirýsqa qarsy kúresti tiimdi etý úshin halyqaralyq uiymdarmen ózara áreketti kúsheitedi. Bul týraly halyqaralyq birqatar uiymnyń ókilimen kezdesken QR Densaýlyq saqtaý vitse-ministri – Bas memlekettik sanitarlyq dáriger Erlan Qiiasov aitty, dep habarlaidy "Ult aqparat".
Onlain-kezdesýge Dúniejúzilik densaýlyq saqtaý uiymy, IýNISEF, IýNFPA, BUUDB jáne CDC halyqaralyq uiymdarynyń ókilderi qatysty. Taraptar áriptestiktiń perspektivalyq baǵyttaryn jáne Qazaqstanda COVID-19 taralýynyń aldyn alý boiynsha júrgizilip jatqan jumysty talqylady.
«Koronavirýs infektsiiasynyń taralýyn toqtatý úshin halyqaralyq yntymaqtastyq, ózara áreket pen qoldaýdyń mańyzy zor. Osy múmkindikti paidalana otyryp, COVID-19-ǵa qarsy kúreste Qazaqstan halqyna gýmanitarlyq jáne praktikalyq kómek kórsetken barlyq uiymǵa alǵys bildiremiz», - dedi E.Qiiasov.
Ministr atap ótkendei, QR Densaýlyq saqtaý ministrligi men halyqaralyq uiymdar arasyndaǵy yntymaqtastyqty naǵaitýǵa múmkindik mol. Alaida, ózara áreketti áli de damytý kerek.
«Biz jumysty jandandyrýǵa jáne taraptar úshin ózara tiimdi perspektivalyq baǵyttardy birlesip aiqyndaýǵa daiynbyz», - dep tolyqtyrdy ol.
Kezdesýge qatysýshylar yntymaqtastyqqa, sonyń ishinde vaktsinoprofilaktika máseleleri boiynsha jáne COVID-19 taralýynyń aldyn alý sharalaryn saqtaýǵa daiyn ekendikterin bildirdi.
BUU-nyń Qazaqstandaǵy Turaqty úilestirýshisi Mikaela Friberg-Storm hanym búkil álemde densaýlyq saqtaý, áleýmettik-ekonomikalyq sektorda daǵdarys júrip jatqanyn atap ótti. Qazaqstan da tys qalmady.
«Biz Úkimettiń úlken resýrs jumsap jatqanyn bilemiz jáne baǵalaimyz, jaǵdaidy jaqsartý úshin odan ári qoldaý kórsetýge daiynbyz. Virýsty tek birikkende ǵana toqtatýǵa bolady», - dedi Qazaqstandaǵy BUU ókili.
DDSU-nyń Qazaqstandaǵy Turaqty ókili Karolin Klarinval aldaǵy ailarda halyqty aqparattandyrýda qoǵamdyq densaýlyq saqtaý sektorymen ózara is-qimyl kúsheie túsetinin atap ótti.
IýNISEF-tiń Qazaqstandaǵy ókili Artýr van Dizen Ministrliktiń qatysýshylary men ókilderiniń nazaryn ózge de infektsiialardyń aldyn alý, baqylaý sharalaryn da jalǵastyrýdy, sondai-aq Ulttyq egý kúntizbesi boiynsha balalardy vaktsinatsiialaýdy qaita bastaýǵa aýdardy.
IýNFPA-nyń QR-daǵy ókili Djýliia Valeza genderlik zorlyq-zombylyqtyń aldyn alý boiynsha birlesip jumys isteýge daiyn ekendigin jáne osy baǵytta aqparattyq-túsindirý jumysyn júrgizýge nietin bildirdi.
«Biz halyqtyń osal toptarymen jumys isteýge daiynbyz. Kórý nemese estý qabileti buzylǵan adamdar arasynda koronavirýs infektsiiasy týraly aqparat taratýda ministrlikke qoldaý kórsetýge ázirmiz», - dedi D.Valeza.
Ortalyq Aziiadaǵy SDS óńirlik direktory Daniel Singer indetke der kezinde den qoiý, sondai-aq zerthanalyq zertteýlerdi nyǵaitý úshin TJ boiynsha oqý ortalyǵynyń jumysyn qoldaýdyń mańyzdylyǵyn atap ótti.
«AQSh úkimeti atynan zerthanalardy kúsheitýge kóńil bólemiz. Sonymen qatar, biz pandemiiadan keiingi kezeńde ne isteitinimizdi jáne osy jaǵdaidan qandai tájiribe jinaǵanymyzdy oilaý kerek. Osyǵan bailanysty, biz Qazaqstanǵa uzaq merzimdi jospar ázirleýge jáne jiberilgen qatelerge baǵa berýge kómektesýge daiynbyz. Sondai-aq, biz densaýlyq saqtaý sektoryndaǵy birqatar jobalardy investitsiialaýdy jalǵastyrýǵa niettimiz», - dedi SDS ókili.
IýSAID-tiń QR-daǵy ókili Kristian Fang QR-daǵy COVID-19-dyń aldyn alý boiynsha birlesken áriptestiktiń, sondai-aq halyqtyqtyń saqtyq sharalaryn saqtaýy óte mańyzdy ekenin atap ótti.
E.Qiiasov qatysýshylardy Qazaqstandaǵy densaýlyq saqtaý salasyndaǵy qazirgi jaǵdaimen tanystyrdy.
«Ýaqytyly engizilgen qatań shekteý sharalarynyń arqasynda elimizde koronavirýs infektsiiasymen syrqattanýshylyq boiynsha epidemiologiialyq ahýal turaqtaldy», - dedi Bas sanitarlyq dáriger.
Osylaisha, ministrlik halyqqa PTR-testileýdi qoljetimdi etti, dári-dármek qory jasaldy, naýqaspen bailanysta bolǵan adamdarǵa monitoring júrgizildi, aqparattyq tehnologiialar engizildi, halyqty aqparattandyrý boiynsha jumys jandandyryldy, táýlik boiy call-ortalyq qyzmet etti, 16 modýldik aýrýhana salyndy jáne 3 infektsiialyq aýrýhana rekonstrýktsiialandy, 63 ambýlatoriialyq-emhanalyq uiym paidalanýǵa berildi, meditsinalyq uiymdar ÓJJ apparaty (3 264 birlik) jáne rentgendik diagnostikalyq jabdyqpen qamtamasyz etildi. Elimizdiń meditsinalyq joǵary oqý oryndarynda sanitarlyq-gigienalyq beiindegi fakýltetter qaita ashyldy.
2021 jylǵy 1 aqpannan halyqty kezeń-kezeńmen KVI-ge qarsy vaktsinatsiialaý bastaldy. 15 aqpanda Qaraǵandy farmatsevtikalyq kesheni óndirgen «Spýtnik V» vaktsinasy tirkeldi. Biyl sáýir aiynda otandyq inaktivtendirilgen QAZCOVID-IN vaktsinasyn paidalaný josparlanyp otyr. Sonymen qatar, vaktsina alǵandardyń turaqty esebin júrgizý úshin halyqaralyq júielermen integratsiialaýǵa bolatyn vaktsinalaýdyń elektrondyq pasporty ázirlenip, engiziledi.
