Koronavirýsqa qarsy 232 preparattyń quny ortasha eseppen 27 paiyzǵa tómendetildi. Bul týraly búgin Úkimet otyrysynda QR Densaýlyq saqtaý ministri Aleksei Tsoi aitty, dep habarlaidy "Ult aqparat".
«Búginde elimiz dárilik zattardyń jáne meditsinalyq buiymdardyń qajetti kólemimen tolyq qamtamasyz etilgen. Aýrýhanalarda KVI-den emdeýge arnalǵan dáriniń bir ailyq qory, al «SQ-Farmatsiia» qoimalarynda jáne dárihanalarda 2 ailyq qory jasaqtalǵan. Barlyq óńirde 18 mlrd teńgeniń dárilik zattarynyń turaqtandyrý qory qurylǵan», - dedi ol.
Ministrdiń atap ótýinshe, ótken jyldyń tamyz aiynan beri aýrýhanalar men dárihanalarǵa júktemeni tómendetý maqsatynda KVI-den emdeýge arnalǵan dáriniń 5 túri ambýlatorlyq deńgeide tegin beriledi. Mundai dárilik zattardyń 1 mln adamǵa jetetin qory bar. Sonymen qatar koronavirýsqa qarsy 232 preparattyń quny ortasha eseppen 27 paiyzǵa tómendetilgen.
«Meditsinalyq maskalar ortasha eseppen 20 teńgeden erkin satylyp jatyr. Qoimalarda 21,5 mln dana kóleminde jetkilikti qor bar. Meditsina uiymdary jeke qorǵanys zattarymen tolyq qamtamasyz etilgen. Óńir ákimdikteri 3 ailyq qor jasaqtap qoidy», - dedi Aleksei Tsoi.
