QR Densaýlyq saqtaý birinshi vitse-ministri Marat Shoranov adamdar kóp jinalatyn jerlerde koronavirýsqa qarsy zararsyzdandyrý nelikten júrgizilmeitinin túsindirdi, dep habarlaidy QazAqparat.
«Byltyr koronavirýs pandemiiasy paida bolǵanda virýstyń taralý joldary naqty zerttelmegen edi. Sondyqtan Dúniejúzilik densaýlyq saqtaý uiymynyń usynysyna orai zararsyzdandyrý jumystary jii júrgizildi. Ol tek Qazaqstanda emes, álem elderinde oryn aldy. 2020 jyly ministrlik koronavirýstyń belgisiz virýs bolýyna bailanysty adamdar kóp jinalatyn oryndardy, aialdamalardy, qoǵamdyq kólikterdi zararsyzdandyrý, zararsyzdandyrý týnnelderin ornatý sheshimin qabyldady», - dedi birinshi vitse-ministr Ortalyq kommýnikatsiialar qyzmetinde ótken baspasóz máslihaty barysynda.
Onyń atap ótýinshe, búginde júrgizilgen zertteý nátijeleri mundai is-sharalardyń tiimdiligi tómen ekendigin kórsetken.
«Osyǵan orai ministrlik ǵimarattardy, kóshelerdi, qoǵamdyq oryndardy zararsyzdandyrýdan bas tartý týraly sheshim qabyldady. Bul Dúniejúzilik densaýlyq saqtaý uiymynyń usynysyna sai keledi», - dedi Marat Shoranov.
