Koronavirýs indeti etek jaiǵaly álem elderi jedel virýsqa qarsy vaktsina ázirleýge kirisip ketti. Búgingi kúni birneshe el ǵalymdar.y vaktsina ázirlep, ony synaqtan ótkizýde. Onyń ishinde bizdiń otandyq ǵalymdar da bar, dep habarlaidy QazAqparat.
Qazaqstandyq ǵalymdar atalǵan virýsqa qarsy vaktsina ázirleýge naýryz aiynyń sońynda kirisken bolatyn. Osy oraida otandyq ǵalymdardyń vaktsina ázirleýdegi jetistigi týraly tilshimizge QR Bilim jáne ǵylym ministrligi Ǵylym komitetine qarasty Biologiialyq qaýipsizdik problemalary ǵylymi-zertteý institýty bas direktorynyń ǵylym jáne kommertsiialandyrý jónindegi orynbasary, veterinariia ǵylymynyń doktory Erǵali Ábdiraiymov áńgimelep berdi.
«Koronavirýs indetine qarsy vaktsina ázirleýdi bizdiń institýttyń ǵalymdary naýryz aiynyń sońynda qolǵa aldy. 9 mamyrda alǵashqy vaktsina daiyn boldy. Sondai-aq, ol Dúniejúzilik densaýlyq saqtaý uiymynda alǵashqy qazaqstandyq kandidatty vaktsina retinde tirkelip, klinikaǵa deiingi synaq júrgizildi. Shilde aiynyń sońynda alynǵan nátijeler boiynsha otandyq vaktsina ziiansyzdyǵy, pirogendigi, immýnogendigi jáne taǵy basqa parametrleri boiynsha halyqaralyq jáne Qazaqstandyq farmakopeia talaptaryna tolyq sai keletini dáleldendi», - dedi E. Ábdiraiymov.
Onyń aitýynsha, atalǵan vaktsina klinikalyq synaqtan ótken soń Densaýlyq saqtaý ministrligine tirkeýge jiberiledi.
«Sonymen qatar bizdiń ǵalymdar 30-31 shilde kúnderi ekinshi sýbbirlikti vaktsina ázirledi, ol Dúniejúzilik densaýlyq saqtaý uiymynda tirkeldi. Bul bizdiń ǵalymdardyń ázirlegen ekinshi vaktsinasy. Sonymen qatar ony ázirleýge bizdiń institýttyń barlyq ǵalymdary atsalysty. Al vaktsina kimderge egiledi degen suraqqa kelsek, Densaýlyq saqtaý ministrliginiń talaptary basshylyqqa alynady», - dedi ol.
Mamannyń málimdeýinshe, jalpy koronavirýs indetine qarsy vaktsinanyń daiyn bolý merzimi klinikalyq synaqtardyń nátijesinde anyqtalady.
«Vaktsinanyń baǵasy týraly aitýǵa áli erterek. Jalpy búgingi kúni vaktsina ázirleý tehnologiiasy men talaptary belgili. Qazirgi ýaqytta ár eldiń ǵalymdary óz múmkindikteri men bar noý-haýdy qoldanýda, sondyqtan belgili bir eldiń vaktsinasyna qatysty durys nemese burys dep aitýǵa bolmaidy», - deidi ǵylym doktory.
