37 jastaǵy Aqtóbe turǵyny Ashyq júiesindegi "qyzyl" statýsyna bailanysty birneshe kúnnen beri jumysqa bara almai, júiege qosylǵan nysandarǵa kire almai júrgenin aitty. Onyń aitýynsha, júiede qate ketken, al ózi múlde koronavirýs infektsiiasyn juqtyrmaǵan, - dep habarlaidy "Diapazon".
"Men koronavirýs juqtyrǵan joqpyn, biraq Ashyq júiesinen ózimdi teksergende "qyzyl" statýsqa ie ekenimdi bildim. Qazir búkil jerde Ashyq júiesi qosylǵandyqtan jumysyma bara almaimyn, túrli nysandarǵa kire almaimyn.
Koronavirýs infektsiiasyn menimen attas adam juqtyrǵanyn bildim. Ekeýmizdiń tolyq aty-jónimiz birdei, biraq týǵan kúnimiz ben turǵylyqty mekenjaiymyz ártúrli. Al derekter bazasynda onyń JSN ornyna, meniń JSN engizip jibergen. Osyndai qatelik saldarynan, bireýdiń nemquraidylyǵynan, uqypsyzdyǵynan men birneshe kún boiy japa shegip jatyrmyn. Bul durys pa? Shyn máninde virýs juqtyrǵan adam qazir qalada erkin qydyryp júr, al men úi qamaqta otyrmyn. Bul qalai?", - dedi qala turǵyny Aleksei.
№4 emhananyń bas dárigeriniń mindetin atqarýshy mundai jait jyljymaly brigada dárigeriniń derekterdi qate engizýine bailanysty bolǵanyn aitty. Bul derek boiynsha ishki taldaý júrgizilgen. Biraq ázirge bári nátijesiz.
Aqparatty oblystyq sanitariialyq-epidemiologiialyq baqylaý departamenti de teksergen.
«№4 Aqtóbe qalalyq emhanasynda mundai jaǵdai tirkeldi. Analiz alǵan kezde málimetter qate toltyrylǵan. Biz birden habarlasyp, qatelik túzetildi. Kóp ýaqyt qajet emes, bir kúnde barlyǵyn qalpyna keltiremiz. Shynyna kelgende adam qazir kóp, júkteme eselendi. Adami faktor bolyp tur», - dedi oblystyq sanitariialyq-epidemiologiialyq baqylaý departamenti basshysynyń orynbasary Raihan Qoishanova.
