Nur-Sultan qalalyq qoǵamdyq densaýlyq saqtaý basqarmasynyń basshysy Sáýle Qisyqova koronavirýs infektsiiasyn juqtyrǵan adamdar birinshi kezekte ne isteý kerektigin túsindirdi, dep habarlaidy QazAqparat.
«Taǵy da eske salyp óteiin, eger koronavirýs infektsiiasyna tapsyrǵan analizden indet anyqtalsa, onda úide oqshaýlaný kerek. Osy oraida maska taǵý rejimin saqtap, kúnine úsh márte termometriia júrgizý qajet. Sonymen qatar, jeke gigienanyń barlyq sharalaryn oryndap, jeke ydystardy paidalanyp, bólmeni jeldetken durys», - dedi S. Qisyqova Ortalyq kommýnikatsiialar qyzmetinde.
Onyń sózine qaraǵanda, dene qyzýy 38 gradýstan joǵary bolsa, 500 milligramnan paratsetamol jáne kúnine bir ret aspirin (150 milligram) qabyldaý kerek.
Sáýle Qisyqovanyń aitýynsha, 3-5 kún aralyǵynda dene qyzýynyń kóterilýi kornavirýs infektsiiasy qalypty dárejede ótip jatqanda baiqalady.
«Aýmaqtyq tirkelý jerine qarai jedel-járdem nemese emhananyń call-ortalyǵyna habarlaý kerek. Osy oraida karantin jaiynda jáne ne sebepti habarlasqanyńyzdy eskertý qajet», - dedi ol.
Osy oraida S. Qisyqova qarttar, júrek-qan tamyry ári onkologiialyq aýrýy barlar, transplantatsiialaýdan ótken turǵyndar ózderin emdeýmen ainalyspai, birden ýchaskelik dárigermen bailanysqa shyǵýy kerektigin eskertti.
