Balqash qalasynyń 50 jastaǵy turǵyny shahardaǵy stýdenttik kolledjdiń jataqhanasyna koronavirýs juqtyrǵan naýqastardy ornalastyrdy degen jalǵan aqparatty jeli arqyly taratqany úshin aiyptalýda, dep habarlaidy "Ult aqparat".
12 naýryzda «WhatsApp» messendjerin monitoringten ótkizý kezinde politsiia qyzmetkerleri Balqash qalasynyń meditsinalyq kolledjiniń stýdentterin jataqhanadan májbúrlep shyǵarý jáne onda koronavirýs juqtyrǵan úsh júz adamdy qonystandyrýǵa daiyndaý týraly kórineý jalǵan aqparat berý faktisin anyqtady.
«Atalǵan fakti boiynsha QK-niń 274-babynyń 2-bóligi boiynsha sotqa deiingi tergeý bastaldy. Júrgizilgen is-sharalardyń nátijesinde politsiia qyzmetkerleri atalǵan qylmysty jasady degen kúdikpen Balqash qalasynyń 50 jastaǵy turǵynyn anyqtady», - dep habarlady Qaraǵandy oblysy PD baspasóz qyzmeti.
Sonymen qatar, Qaraǵandy oblysynyń politsiia departamenti aimaq turǵyndaryn áleýmettik jelilerde paida bolǵan jalǵan habarlamalar men oi-pikirlerge senbeýge shaqyrady. Tártip saqshylary quzyretti memlekettik organdardyń resmi málimetterine ǵana negizdelý kerektigin málimdeidi.
Esterińizge sala keteiik, osyndai qylmystardy jasaǵany úshin 7 jylǵa deiin bas bostandyǵynan aiyrý jazasy qarastyrylǵan.
