Aqmola oblysyndaǵy «Shapaǵat» arnaýly áleýmettik qyzmet kórsetý ortalyǵynda 34 qarttan jáne olardyń kútimimen ainalysatyn 1 qyzmetkerden koronavirýs anyqtaldy. Taǵy 2 adam indetten kóz jumdy, - dep habarlaidy coronavirus2020.kz.
«Aqmola oblysy Jumyspen qamtýdy jáne áleýmettik baǵdarlamalardy úilestirý basqarmasynyń «Shapaǵat» arnaýly áleýmettik qyzmet kórsetý ortalyǵy Nur-Sultan qalasynan 5 km jerde, Tselinograd aýdanyndaǵy Aqqaiyń aýylynda ornalasqan. 16 naýryz kúni karantin jariialanǵan ýaqytta Ortalyqta qamqorlyqqa alynǵan 147 adam (azamattardyń ortasha jasy – 75) boldy. Sol jerde jumys isteitin 74 adamnyń 51-i demalys pen qashyqtan jumys isteýge jiberilgen. 2 sáýir kúni 1947 jylǵy azamat qaitys boldy. 6 sáýirde 1929 jyly týǵan áiel adam ómirden ótti. Ekeýinde de koronavirýs belgileri bolmaǵan, indet qaitys bolǵannan keiin anyqtaldy», - delingen aqparatta.
Osy oqiǵaǵa bailanysty Aqmola oblystyq Qyzmetter men taýarlarlyń sapasy men qaýipsizdigin baqylaý departamenti sanitarlyq-epidemiologiialyq tekserý júrgizgen.
«Bailanysta bolǵan adamdar anyqtalyp, COVID-19-dy anyqtaý boiynsha laboratoriialyq tekserý júrgizildi. Infektsiia juqtyrǵandarmen qarym-qatynasta bolýyna bailanysty barlyq qyzmetkerler men qamqorlyqqa alynǵan azamattardan qan taldaýy alyndy. PTR-zertteý nátijesi boiynsha, 9 sáýir kúni 35 adamǵa COVID-19 diagnozy qoiyldy (qamqorlyqqa alynǵan 34 adam men 1 qyzmetker áiel)», - delingen taratylǵan málimette.
Búginde barlyq naýqas infektsiialyq statsionarǵa oqshaýlandyryldy. Bekitilgen hattamaǵa sáikes em alyp jatyr. Olarmen bailanysta bolǵan adamdardy anyqtaý jáne meditsinalyq baqylaý jumystary jalǵasýda.
2020 jyldyń 9 sáýiri kúngi málimet boiynsha, Aqmola oblysynda 56 adamnyń COVID-19 juqtyrǵany rastaldy:
1. Tselinograd aýdany – 51 jaǵdai;
2. Arshaly aýdany – 3 jaǵdai;
3. Kókshetaý qalasy – 1 jaǵdai;
4. Shortandy aýdany – 1 jaǵdai.
