QR Prezidenti janyndaǵy Qazaqstan strategiialyq zertteýler institýty halyqaralyq zertteýler bóliminiń basshysy Ásel Nazarbetova Qaýipsizdik Keńesiniń otyrysy týraly pikir bildirdi, dep habarlaidy QazAqparat.
«QR Tuńǵysh Prezidenti – Elbasy Nursultan Nazarbaevtyń tóraǵalyǵymen ótken Qaýipsizdik Keńesiniń otyrysynda ishki jáne jahandyq deńgeidegi kún tártibindegi óte ózekti máseleler qaraldy. Iaǵni, eldi dúr silkindirgen Qordai oqiǵasy, búkil álemniń zor alańdaýshylyǵyn týdyryp otyrǵan koronavirýs indetimen kúres siiaqty máseleler, únemi Elbasynyń nazarynda jáne osy jaǵdailardyń saldaryn retke keltirýge Qaýipsizdik Keńesiniń múshelerin jumyldyryp, kóp jyldyq mol basqarýshylyq tájiribesimen bólisýde», -deidi sarapshy.
Qordai oqiǵasy týraly Elbasynyń: «Bul oqiǵa meni qatty alańdatady. Otyz jyl boiy halqymyzben birge edáýir qiyndyqtardy ótkerip edik. Jastar bul qiyndyqtardy tipti elestete de almaidy», - degen sóziniń astarynda búgingi kúnimizdiń igiligin ótkenimizge, memleket qurýdaǵy kúrdeli jolymyzǵa árdaiym baǵa bere otyryp seziný kerek degen oi jatyr.
«Jambyl oblysynyń Qordai aýdanynda oryn alǵan jaitty qalpyna keltirý jumystary tiisti qarqynmen júrip jatyr. Degenmen oqiǵanyń sebebin jan-jaqty, keshendi túrde zerttep, osydan sabaq alý arqyly mundai konfliktilerdi boldyrmaý tek memlekettik organdar, quzyretti tulǵalar, QHA ókilderiniń, sarapshy-zertteýshilerdiń ǵana jaýapkershiligimen shektelmegeni durys. Osy kúnderi aitylyp jatqan pikirler, ýájder, úndeýler elimizdegi pikir alýandyǵynyń, tipti qarama-qaishy ustanymdardyń aiqyn kórinisi boldy. Sol sebepti árbir Qazaqstan azamatynyń eń basty qundylyǵy – eldegi turaqtylyq ekenin taǵy qaitalaimyz», - dedi Á. Nazarbetova.
Spikerdiń aitýynsha, jer-jahandy ortaq qaýip-qaterge boi aldyryp otyrǵan koronavirýs dertiniń órshýi de adamzat taǵdyryna áser etetin faktorlardyń kenetten paida bolatynyn, onymen kúreste barlyǵymyzdyń birigýimiz qajet ekenin aiǵaqtaidy.
«Sebebi koronavirýs saldary álemdik ekonomikaǵa, iaǵni álem halyqtarynyń turmys-tirshiligine áser etpei qoimaidy. QR Tuńǵysh Prezidenti – Elbasy N.Á.Nazarbaevtyń Qaýipsizdik Keńesiniń kún tártibine atalǵan máselelerdi shyǵarýy olardyń aýqymdylyǵyna jáne qaýipsizdigimizge syn-qater ekendigine mán bergizdi, saldaryn eńserýde ortaq jaýapkershiliktiń mańyzdylyǵyn kórsetti», - dedi Ásel Nazarbetova.
