Qazaqstanda koronavirýspen taǵy 8078 adam tirkeldi, aýrýǵa osy kezge deiin shaldyqqandar qatarynan 104 adam qaitys boldy. Bul týraly 1 tamyz kúni Qazaqstan densaýlyq saqtaý ministrligi habarlady.
Tirkelgen naýqastardyń 7803-i virýs juqtyrǵanyn PTR analizimen rastaǵan. Bilik mundai naýqastardy KVI+ sanatyna qosady.
8 maýsymnan beri aimaqtar kóshin bastap kelgen Nur-Sultan qalasy 31 shilde kúngi kórsetkishter boiynsha ekinshi orynnan tabyldy. Qalada bir kúnde 1507 naýqas tirkelgen. Astanada kúndelikti anyqtalatyn naýqas sany keiingi aptada turaqty túrde 1,5 myńnyń ústinde boldy.
Táýlik boiynsha eń joǵarǵy kórsetkish Almaty qalasynda tirkeldi. Onda koronavirýs bir kúnde 1535 adamnyń analizinen tabylǵan. Qalada kúndelik tirkeletin naýqas sany osymen ekinshi kún qatarynan 1,5 myńnan asyp otyr.
Odan keiingi orynda 964 naýqaspen Qaraǵandy oblysy tur. 28 shilde kúni bul oblysta myńnan astam naýqas anyqtalǵan.
Qalǵan aimaqtarda jaǵdai mynadai:
- Shymkent qalasynda – 585 (naýqas),
- Aqmola oblysynda – 256,
- Aqtóbe oblysynda – 251,
- Almaty oblysynda – 334,
- Atyraý oblysynda – 415,
- Shyǵys Qazaqstan oblysynda – 198,
- Jambyl oblysynda – 222,
- Batys Qazaqstan oblysynda – 185,
- Qostanai oblysynda – 252,
- Qyzylorda oblysynda – 201,
- Mańǵystaý oblysynda – 254,
- Pavlodar oblysynda – 300,
- Soltústik Qazaqstan oblysynda – 151,
- Túrkistan oblysynda – 183.
Osylaisha, virýs juqtyrǵany PTR analizimen rastalǵan naýqastardyń jalpy sany 580 379 adamǵa jetip otyr. Onyń 5957-si qaitys bolǵan. Qaitys bolǵandardyń bul tizimine koronavirýs juqtyryp, biraq "ózge aýrýdan" kóz jumdy degen eki myńnan astam adam kirmei qalǵan.
Koronavirýs pnevmoniiasy boiynsha (KVI-), 275 naýqas, 13 ólim tirkeldi. Virýs juqtyrǵany diagnozy boiynsha anyqtalǵan bul naýqastardyń jalpy sany 61 168-ge jetti. Onyń 3724-i kóz jumdy.
1 tamyzdaǵy málimet boiynsha, elde 98 931 adam koronavirýs infektsiiasynan (96 145 KVI+ jáne 2 786 KVI-) emdelip jatyr.
Olardyń arasynda 28 162 patsient statsionarda, 70 769 naýqas ambýlatoriialyq deńgeide em qabyldaýda.
KVI+, KVI- shaldyqqandardyń arasynda:
1 652 adamnyń jaǵdaiy aýyr,
417 patsienttiń jaǵdaiy óte aýyr,
187 naýqas jasandy tynys alý apparatynda jatyr.
Elde maýsymnyń sońynan beri koronavirýstyń taraýy kúsh alyp, shildeniń ortasynan bastap táýlik kórsetkishi kún saiyn derlik rekord jańartyp turdy. Bilik muny koronavirýstyń «delta» variantynyń taraýymen bailanystyrady. Alǵash ret Úndistanda tirkelgen bul variant alǵashqy varianttarǵa qaraǵanda edáýir juqpaly sanalady. Biraq ǵalymdar qazirgi Covid vaktsinalary bul varianttan da qorǵaidy deidi.
Vaktsinalaý naýqanyn 1 aqpanda bastaǵan Qazaqstandy 19 million adamnyń 10 million ekpe saldyrýy tiis adamdar qataryna jatsa, sonyń 5,4 milliony vaktsinanyń kemi bir komponentin alyp úlgergen. 3,8 millionǵa jýyq azamat tolyq vaktsinalanǵan.
