Nur-Sultanda koronavirýspen aýyratyn naýqastardyń sany kún sanap ósip barady. Naýqastar aýrýhanalarǵa aýyr kúide túsip jatyr. Bul týraly elordanyń shtattan tys bas infektsionist dárigeri Sáýle Atyǵaeva málim etti, dep habarlaidy QazAqparat.
«Byltyrǵy jaǵdai taǵy da qaitalana ma dep qorqamyz. Qazirgi ýaqytta KVI kórsetkishi bárimizdi alańdatyp otyr. Qazir naýqastar aýyr jáne óte múshkil halde aýrýhanalarǵa túsip jatyr. 18 naýryz kúni qala boiynsha koronavirýs infektsiiasyn juqtyrǵan 307 jaǵdai anyqtaldy», - deidi kópsalaly meditsinalyq ortalyqtyń infektsiialyq blogynyń dárigeri.
Dárigerdiń aitýynsha, IVL apparattarda jatqan naýqastar sany kúrt artypty.
Jansaqtaý bólimine táýligine jańadan 5 naýqas jatqyzylady. Ásirese, arteriialyq gipertenziiasy, qant diabeti, júrektiń ishemiialyq aýrýy bar egde jáne kári jastaǵy adamdar úshin koronavirýs óte aýyr bolady», deidi S. Atyǵaeva.
«Ótken jazdaǵy jaǵdai qaitalanbas úshin, sondai-aq ólimge ákeletin óte aýyr jaǵdailardyń aldyn alý úshin turǵyndarǵa sanitarlyq sharalardyń bárin saqtaýdy usynamyz. Kún saiyn sizder men bizdiń amandyǵymyz úshin jumys isteimiz. Biraq jaǵdaidy dárigerlerdiń kómegimen ǵana retteý múmkin emes. Árkimniń jaýapkershiligi mańyzdy ról atqarady», - dedi elorda dárigeri.
Nur-Sultan qalasy dárigerleriniń aitýynsha, infektsiia juqtyratyndar sany ásirese mereke kúnderinen keiin kúrt artady. Adam kóp jinalatyn oryndarda sanitarlyq normalar saqtalmaýynan naýqastar sany aitarlyqtai kóbeiedi. Qala turǵyndary úshin bul baiqalmaýy múmkin, biraq dárigerler jaǵdaidyń kúrt nasharlaǵanyn kórip otyr.
Aita keteiik, qatań sanitarlyq normalar men maska rejimi mindetti túrde saqtalýy tiis.
