Qaraǵandy oblysy ákiminiń densaýlyq saqtaý jónindegi shtattan tys keńesshisi Erjan Nurlybaev óńir turǵyndaryna úndeý joldady. Ol aimaqta KVI jaǵdailary artyp otyrǵanyn habarlady. Bir apta ishinde dertti juqtyrý 157 adamǵa kóbeigen. Bul negizinen 18 jastan 60 jasqa deiingi adamdar, olardyń 65% indettiń belgileri bar.
Epidjaǵdaidy taldaý infektsiianyń negizgi donatorlary úi oshaqtary bolyp tabylatynyn kórsetedi.
Infektsiianyń taralýyn boldyrmaý úshin patsientterdi aýrýhanaǵa jatqyzý kórsetkishteri keńeitildi. Barlyq naýqastar, tipti infektsiiany ońai ótkeretinder de táýlik boiy baqylaýǵa jiberiledi.
«Búgingi tańda statsionarlarda 600 patsient em alýda. Biz buryn konservatsiialanǵan statsionarlardy qatarǵa engize otyryp, aýyrlyǵy ártúrli dárejedegi KVI bar naýqastardy emdeý úshin tósek qoryn ulǵaitý boiynsha sharalar qabyldaimyz. Osy aptada kásiptik aýrýlar institýtynyń ǵimaratynda medýniversitettiń gospitali ashylady. Sodan keiin patsientterdi Ohotskaia kóshesindegi infektsiialyq statsionar da qabyldai bastaidy», - dedi Erjan Nurlybaev.
Sondai-aq, shtattan tys keńesshi óńirde vaktsinatsiia jalǵasyp jatqanyn eske saldy. 6 myń meditsina qyzmetkeri, myńnan astam pedagog, TJ qyzmetiniń 300 qyzmetkeri ekpe aldy. Turǵyndardy erikti vaktsinalaý da bastaldy. Qazirdiń ózinde 200-den astam adam egildi.
Birinshi sáýirde oblysqa «Spýtnik V» vaktsinasynyń jańa partiiasy keledi. Ol aýyldyq jerlerge baǵyttalady.
«Qurmetti oblys turǵyndary! Alda bizdi uzaq merekeler kútip tur. Osyǵan bailanysty biz sizderden otbasylyq merekeler men qonaqqa barýdan bas tartýdy suraimyz. Adamdar kóp jinalatyn jerlerge barýdan aýlaq bolyńyzdar, qoǵamdyq kólikte maska kiińizder. Óz densaýlyǵyńyzdy qorǵańyzdar!» - dep Erjan Nurlybaev halyqqa úndeý joldady.
