Densaýlyq saqtaý vitse-ministri Ajar Ǵiniiat qonaq úilerden koronavirýstan emdeitin gospital ashý sharalary týraly aityp berdi, dep habarlaidy QazAqparat.
«Qazirgi ýaqytta 46 745 tósek-oryn daiyn tur. Rezervtik 17 myń oryndy qonaqúilerde ázirlep otyrmyz. Bul óte az, Nur-Sultandy alsaq, bul qalada Ramada Plaza-ny keńeitemiz. Onda 200 tósek-oryn bolǵan edi, jappai qabyldaý bolǵan jaǵdaida qosymsha 100 tósek qosamyz, oǵan negizinen ortasha naýqastar túsedi. Qazir basqa aýrýlarmen aýyratyn naýqastarǵa shuǵyl jáne josparly kómek kórsetetin aýrýhanalarǵa tiispeý úshin ortasha-aýyr naýqastarǵa osyndai meditsinalyq emes nysandardy daiyndap jatyrmyz», - dep túsindirdi Ajar Ǵiniiat Ortalyq kommýnikatsiialar qyzmetinde ótken brifingte.
Onyń aitýynsha, Almatyda kovidtik gospitaldar «Almaty Arenada» ornalasqan.
«Almaty qonaqúilerinen gospital ashýdyń qajettiligi joq. «Almaty arena» kesheni óziniń tiimdiligin kórsetti. Kem degende naýqastar baqylaýda boldy jáne qarqyndy palata dep atalatyn segiz reanimatsiialyq tósek bar. Meditsinalyq emes uiymdar halyqtyń tyǵyzdyǵy óte joǵary jerlerde ashylady. Ázirge basqa aimaqtar qolda bar tósek-orynmen jumys isteýde. Búgingi tańda respýblika boiynsha tósek-oryndar 53 paiyzdy, reanimatsiialyq tósek oryndary 43 paiyzdy quraidy», - dedi Ajar Ǵiniiat.
