Joǵary sanatty infektsionist dáriger, meditsina ǵylymdarynyń kandidaty Sáýle Atyǵaeva revaktsinatsiia júrgizý úshin qandai alǵysharttar bolý kerektigin aitty, dep habarlaidy QazAqparat.
«Ol úshin halyqtyń immýndyq deńgeii, infektsiiadan keiingi jáne vaktsinatsiiadan keiingi immýnitettegi qaishylyqtar zertteledi. Aýyrǵan adamdar men vaktsina alǵan adamdarda antidenelerdiń deńgeii qanshalyqty joǵary ári uzaq saqtalatyny qadaǵalanady. Immýnolog, virýsolog, infektsionist mamandar osynyń bárin taldaidy. Sol talqylaýlardyń qorytyndysy boiynsha Densaýlyq saqtaý ministrligine halyqty qaita vaktsinalaý qajettiligi nemese qajet emestigi týraly usynymdar beredi», - dedi infektsionist.
Mamannyń aitýynsha, qazir bul másele otandyq ǵalymdar arasynda talqylanyp jatyr.
«Qandai da bir qorytyndy bermes buryn, máseleni zertteý kerek. Revaktsinatsiia máselesi infektsiiamen aýyrǵan nemese vaktsinalanǵan adam aǵzasyndaǵy antidenelerdiń qanshalyqty uzaq saqtalatynyn bilgennen keiin sheshiledi. Naqty qorytyndy alǵan kezde ǵana revaktsinatsiia týraly suraqqa jaýap bolady», - dedi Sáýle Atyǵaeva.
