Niderlandyda lokdaýnǵa qarsy demonstranttarǵa politsiia sý shashyp, rezeńke taiaq qoldandy. Irlandiia AstraZeneca vaktsinalaryn qoldanýdy ýaqytsha toqtatqan Eýropanyń birneshe eliniń qataryna qosyldy. Bul – vaktsina alǵandarda tromboz paida bolyp jatqandyǵy týraly habarlamalarǵa bailanysty. Degenmen, vaktsinatsiia men qan uiý arasyndaǵy bailanys áli de dáleldenbegen. Al Parijdegi jansaqtaý bólimshelerinde jatqan naýqastar basqa qalalarǵa aýystyrylyp jatyr. Álemdegi osy jáne ózge de jańalyqtar jóninde VVS habarlaidy.
Niderlandy politsiiasy Gaagadaǵy demonstratsiiany taratý úshin adamdarǵa qarsy sý shashyp, taiaq paidalandy. Mitingige qatysýshylar karantin sharalaryn joiýdy talap etýde.
Jeksenbide Gaaga ortalyǵyndaǵy alańǵa narazylyq bildirýshi eki myńǵa jýyq adam jinaldy. Áleýmettik qashyqtyqty saqtamaǵan turǵyndar miting aiaqtalǵannan keiin de úilerine taraýdan bas tartqan. Daýys zoraitqysh arqyly jasalǵan eskertýlerdi elemegen. Budan soń politsiia kúsh qoldana bastady. Birneshe adam ustaldy.
Niderlandyda karantinge qarsylyq bildirýshilerdiń agressivti narazylyqtary ekinshi ai jalǵasýda. Olar shekteýler múldem qajet emes nemese qoǵamnyń eń osal toptaryna ǵana qatysty bolýy kerek dep sanaidy.
Qańtar aiynyń sońynan bastap Niderlandyda qatań lokdaýn kúshine endi. Meiramhanalar men barlar jabyq, Ekinshi dúniejúzilik soǵys ýaqytynan beri elde alǵash ret komendanttyq saǵat engizilgen.
Irlandiianyń Ulttyq immýndaý komiteti trombtardyń paida bolýyna bailanysty Norvegiiadan kelip túsken jańa habarlamalardan keiin Oksford ýniversiteti men AstraZeneca kompaniiasy óndirgen vaktsinany qoldanýdy ýaqytsha toqtatýǵa keńes berdi.
Buǵan deiin AstraZeneca vaktsinasyn Bolgariia, Daniia, Islandiia, Norvegiia jáne Tailand toqtatty. Sebebi Eýropanyń 30-ǵa jýyq turǵyny Oksford vaktsinasyn alǵannan keiin trombtar problemasyna shaǵymdanǵan. Dúniejúzilik densaýlyq saqtaý uiymy juma kúni AstraZeneca vaktsinasy men qan uiyǵyshtyq arasynda eshqandai dálel joq ekenin málimdep, elderdiń biligin pandemiiamen kúreste vaktsinany qoldanýdy toqtatpaýǵa shaqyrdy.
Frantsiia biligi el astanasynyń meditsinalyq mekemeleriniń júktemelerin jeńildetý úshin keibir naýqastardy Parijden jáne onyń mańynan eldiń basqa qalalaryna tasymaldaý sheshimin qabyldady.
Koronavirýs juqtyrýdyń jańa jaǵdailarynyń kóbeiýine qaramastan, Frantsiia prezidenti Emmanýel Makron áli de ulttyq karantin engizer emes. Koronavirýs boiynsha statistikasy joǵary jekelegen qalalarda qatań sharalar kúshinde, olar tek Parijde qoldanylmaidy.
Qazirgi ýaqytta Frantsiiada Covid-19-ben aýyratyn 4,1 myń adam intensivti terapiia bóliminde jatyr. Onyń 1,1 myńy – Parijde jáne onyń ainalasyndaǵy eldi mekenderde.
