Eýroodaq virýstyń órshýine jáne ólim jaǵdailarynyń artýyna bailanysty Ýkrainany elderdiń «jasyl» tiziminen shyǵardy, dep habarlaidy QazAqparat VVS-ge silteme jasap.
Djons Hopkins ýnivesitetiniń málimetinshe, álemde pandemiia kezinde Covid-19 juqtyrýshylar sany 250 mln adamnan asqan, 5 millionnan astam adam kóz jumǵan.
Reseide alǵash ret bir táýlikte 1,2 myńnan astam ólim jaǵdaiy tirkelgen.
Qazir kóptegen el aýrý juqtyrýshylar sanynyń kúrt artýyna alańdaýly. AQSh, Ulybritaniia men Reseide epidahýal óte kúrdeli bolyp otyr.
Osy úshtikten keiingi qatarda Túrkiia, Ýkraina men Germaniia tur. Seisenbi kúni Eýroodaq epidemiologiialyq jaǵdaiy qolaily elderdiń «jasyl» tiziminen Ýkrainany shyǵaryp tastaǵany belgili boldy. Sońǵy 28 kúnde munda jarty millionnan astam adam aýrýǵa shaldyqqan, 14,6 myń adam kóz jumǵan. Elde pandemiia bastalǵaly koronavirýstan 78 myń adam qaitys bolǵan.
«Jasyl» tizimge azamattary úshin EO biligi mindetti emes (iaǵni týristik) saiahatqa shekteýlerdi alyp tastaýdy usynatyn elder kiredi; endi mundai saparlardy shekteý usynylady. Alaida, EO biligi men Ýkrainanyń syrtqy ister ministrligi túsindirgendei, bul ýkraindyqtar endi Eýropaǵa vizasyz barý quqyǵynan avtomatty túrde airylady degendi bildirmeidi. Bul týraly sheshimdi ár el jeke qabyldaidy, al ázirge EO memleketteriniń kópshiligi halyqaralyq deńgeide tanylǵan preparattarmen tolyq vaktsinalaýdan ótken ýkraindyqtarǵa kirýge ruqsat beredi.
«Ýkraina EO-nyń «jasyl» tiziminen shyǵarylǵannan keiin EO shekaralaryn tolyǵymen jabýǵa bolmaidy. Bul usynys, al sońǵy sheshimdi ár el jeke qabyldaityn bolady. Ýkrainanyń SIM ýkrainder úshin barynsha saiahat erkindigin saqtaý úshin seriktesterimen belsendi túrde jumys isteýde», - dep jazdy Tvitterde Ýkraina SIM basshysy Dmitrii Kýleba.
