№4 Almaty qalalyq emhanasynyń monitoring jáne taldaý bóliminiń basshysy Gúljan Qartaeva onlain brifing barysynda COVID-19-ǵa qarsy vaktsinatsiialaýdyń ózekti máseleleri týraly baiandady, dep habarlaidy QazAqparat.
Densaýlyq saqtaý basqarmasynyń ókili vaktsinatsiiadan keiin janama áserler paida bolǵan jaǵdaida, azamattar emhanaǵa habarlasýy qajet ekenin atap ótti. Ol jerde ýaqytsha eńbekke jaramsyzdyq paraǵyn ashyp beredi
«Eger vaktsina salynǵannan keiin patsienttiń temperatýrasy kóterilse, onda ol eńbekke jaramsyzdyq paraǵyn alýǵa quqyly», - dedi Gúljan Qartaeva brifing barysynda.
Brifing barysynda oǵan vaktsinanyń bir komponentin Almatyda, ekinshisin Nur-Sultan qalasynda júrgen jerinen saldyrýǵa bola ma degen saýal qoiyldy.
«Eger adam birinshi komponentin Almatyda saldyrsa, ekinshisinde sol jerde ǵana saldyra alady. Ol Nur-Sultan qalasynda vaktsinanyń ekinshi komponentin saldyra almaidy», - deidi spiker.
Almaty qalasy boiynsha 2021 jylǵy aqpan aiynyń 1-nen sáýir aiynyń 15 aralyǵynda barlyǵy 108 069 adam vaktsina alǵan. Keshe – 10 924 adamǵa vaktsina saldyrypty. Onyń ishinde 9 985 quqyq qorǵaý organdarynyń qyzmetkeri, 11 178 – muǵalim, 13 951 – meditsina qyzmetkeri, basqa sanattaǵylar arasynda - sozylmaly aýrýlary bar naýqastar men tirkelgen turǵyndar.
«Búgingi tańda Almatyda 203 pýnkt jumys isteidi, onda 1 809 meditsina qyzmetkeri bar 406 egý brigadasy jumys isteidi, dárigerlerge eriktiler kómektesedi. JOO men kolledjderde mamandar 91 emhananyń egý pýnktterinde, saýda-oiyn-saýyq ortalyqtarynda jáne qalamyzdaǵy bazarlarynda jumys isteidi. Qazirgi ýaqytta 364 bilim alýshy internder men rezidentter jumys isteýde. Barlyǵy 975 adam oqytyldy», - dedi Gúljan Qartaeva.
Sonymen qatar, ol altynshy transh boiynsha sáýirdiń 13 kúni qalaǵa vaktsinanyń 65 290 dozasy jetkizilgenin aitty.
Qazir vaktsinanyń qaldyǵy 68 330 dozany quraidy. Vaktsinanyń kelesi transhy - 34 900 myń doza sáýirdiń 23 kúni keledi dep kútilýde.
