Almatynyń Almaly aýdanynda karantin talaptaryn qasaqana buzatyndarǵa sharalar kúsheitiledi. Bul týraly Óńirlik kommýnikatsiialar qyzmetinde ótken brifingte Almaly aýdanynyń ákimi Serik Qusaiynov aitty, dep habarlaidy QazAqparat.
«Aýdanda 4 monitoringilik top quryldy (2 kúndizgi, 2 túngi). Monitoring toptary kún saiyn, kúndiz jáne túnde jumys isteidi. Sondai-aq, kúndizgi toptar aýdannyń iri magistraldy kóshelerinde jolaýshylar kóligine monitoring júrgizedi. Qoǵamdyq kólik jolaýshylaryna túsindirý jumystary júrgiziledi, sondai-aq júrgizýshilerge betperde rejimin saqtaý týraly nusqaýlyq júrgiziledi», - dedi S.Qusaiynov.
Jyl basynan beri Almaly aýdanynda 1155 nysan tekserildi.
QR ÁqbK-niń 425-babyna sáikes 44 zańdy tulǵaǵa (aiyppul somasy 28 mln teńge) jáne 117 jeke tulǵaǵa (aiyppul somasy 10,2 mln teńge) qatysty sharalar qabyldandy.
Sotqa 7 nysan boiynsha materialdar berildi. Onyń tórteýine sot sheshimi shyǵaryldy («Finik» meiramhanasy, «Fizika» bary, «Pirat» dámhanasy, «Boohouse» bary), 3 nysan boiynsha materialdar sot qaraýynda («Endorphin» bary, «Gde-to» bary, loto klýb («Topaz-Zabanov E. A.» JK) Seifýllin dańǵyly 402).
«Jalpy, barlyq kásipkerler rejimdi saqtaidy. Biraq, keibir kásipkerler zańdy ainalyp ótip, jumysyn jalǵastyrýda. Biz túngi mekeme ákimshilerimen kúresýdemiz. Biznestegilerge aitarym - barlyq epidemiologiialyq talaptardy saqtaý mańyzdy», - dep eskertti S. Qusaiynov.
Sondai-aq, ol qala turǵyndaryn atalǵan kásipkerlik sýbektilerine barmaýǵa shaqyrdy.
Aita ketý kerek, mereke kúnderi monitoringilik toptyń jumysy kúsheitiledi.
«Monitoringilik toptar kún saiyn jumys isteidi, mereke kúnderi toptar qoǵamdyq oryndarda sanitarlyq-epidemiologiialyq talaptardy saqtaý boiynsha kúsheitilgen jumys rejimine kóshedi. Karantin sharalaryn saqtaý úshin mereke kúnderi adamdar kóp jinalatyn jerlerde ýákiletti organdardyń qyzmetkerleri men qoǵamdyq qyzmetkerlerdi qosymsha tartý josparlanýda», - dedi aýdan ákimi.
Sonymen qatar, sanitarlyq patrýldeý júrgizilip jatyr.
Eger aýdan aýmaǵynda is-sharalar júrgiziletin jáne sanitarlyq normalar buzylatyn bolsa, mysaly, jumys isteitin túngi mekemeler jáne basqa da nysandarǵa qatysty shaǵymdardy qabyldaý boiynsha aýdannyń Sanitarlyq-epidemiologiialyq baqylaý basqarmasynyń jedel jelisi bar.
Turǵyndar 8701-716-59-25 telefonyna habarlasyp, bolmasa 102 nomerine habarlasa alady.
Esterińizge sala keteiik, qyzyl aimaqtaǵy saýda ortalyqtary, saýda úileri, saýda jelileri senbi, jeksenbiden basqa kúnderi jumys isteidi. Qoǵamdyq tamaqtaný nysandary men fýdkorttar tek jetkizip berý jáne saýda úii aýmaǵynan tys alyp shyǵý qyzmetimen saǵat 10.00-den 24.00-ge deiin ashyq bolady.
