Almaty aýrýhanalarynyń jansaqtaý bóliminde tósek-oryn kóbeitiledi. Bul týraly Almaty ákimi Baqytjan Saǵyntaev «Almaty» telaranasyndaǵy Akimat live tikelei efir barysynda aitty, dep habarlaidy QazAqparat.
Naýryzdaǵy jaǵdai boiynsha virýs tez taralyp jatqanyn baiqap otyrmyz. Ótken jyly daiyndaǵan klinikalarda oryn jeterlik. Qazir 7011 tósek-oryn bar. Olar 3 eshelonǵa bólingen: jaǵdaiy aýyr, qalypty jáne jeńil naýqastarǵa arnalǵan. Jumysqa tek 5 myń tósek-oryn alyndy. 5 myńnan sanaǵanda bos oryndar sany 48 paiyzdy qurap otyr», - dedi Saǵyntaev.
Almaty ákimi infektsiialyq aýrýhanalardyń jaǵdai týraly da aityp berdi.
Balalarǵa arnalǵan 2 korpýsy bar infektsiialyq aýrýhana men eresekterge arnalǵan infektsiialyq aýrýhana bar. Qazir 1800 infektsiialyq oryn bar. Onyń 75 paiyzy bos emes. Demek, infektsiialyq oryndardyń 25 paiyzy bos. Jalpy sannan búginde bos oryndar sany 48 paiyzdy quraidy. Jansaqtaý bóliminde 280 oryn bar, onyń 46 paiyzy bos emes. Tańerteń 52 paiyz bolǵan, qazir jańa málimetter keldi. Biz jansaqtaý oryndaryn arttyramyz. 139 jańa jansaqtaý ornyn jasaqtaimyz», - dedi ol.
Almaty ákimi atap ótkendei, ortalyq klinikalyq aýrýhana tolyǵymen bosatyldy.
«Biz naýqastardy ózge aýrýhanalarǵa aýystyrdyq. Ortalyq klinikalyq aýrýhana ótken jyldaǵydai tolyq infektsiialyq aýrýhana retinde jumys istep jatyr. Alaida biz ortaq gospiteldendirýdi burynǵysha júzege asyryp jatyrmyz. Asa aýyr jaǵdaidaǵy naýqastar sany birtindep artyp jatyr. Olardyń sany qazir 35. Jaǵdaiy aýyr naýqastar sany 257. Ortasha jaǵdaidaǵy naýqastar sany 2454. Jansaqtaý bóliminde 145 naýqas jatyr», - dedi Baqytjan Saǵyntaev.
