Almaty, Nur-Sultan jáne Qaraǵandy qalalarynda 17 qańtardan bastap «Ashyq» pilottyq jobasynyń birinshi kezeńi júzege asyrylýda. Mekemege kelýshilerdiń koronavirýsqa qatysty mártebesin anyqtaityn qosymshany qoldaný boiynsha Almaty kósh bastap tur. Bul týraly onlain brifing barysynda qalalyq kásipkerler palatasynyń direktory Aitýar Qoshmambetov aitty, dep habarlaidy QazAqparat.
Koronovirýs infektsiiasynyń taralýynyń aldyn alý jáne kásipkerlik obektilerinde shekteý is-sharalaryn engizý kezeńinde olardy qoldaý maqsatynda «Ashyq» pilottyq jobasyn iske asyrý bastalǵan bolatyn.
Aitýar Qoshmambetovtyń aitýysha, 22 qańtardan bastap «Ashyq» qosymshasy Infokazakhstan.kz platformasymen biriktirildi. Platforma arqyly qatysýshy ótinim berip, QR kod ala alady.
17 naýryzdaǵy jaǵdai boiynsha, «ASHYQ» qosymshasyn 32 808 qoldanýshy júktep alǵan.
Mekemelerge barlyǵy 233 QR kod berildi:
Nur-Sultan qalasy - 62 QR (pilottyq jobaǵa qatysýshylar sany 35);
Almatyda - 110 QR (pilottyq jobaǵa qatysýshylar sany 52);
Qaraǵandy qalasy boiynsha - 34 QR (pilottyq jobaǵa qatysýshylar sany 16).
«QR bas memlekettik dárigeriniń 2021 jylǵy 26 aqpandaǵy №7 qaýlysymen Nur-Sultan, Almaty jáne Qaraǵandy qalalaryndaǵy kásipkerlik obektilerinde «Ashyq» mobildik qosymshasyn engizý boiynsha pilottyq jobany júrgizý týraly sheshim qabyldandy»,- deidi Aitýar Qoshmambetov.
«Ashyq» pilottyq jobasyn kelesi kásipkerlik nysandarda iske asyrýǵa ruqsat etilgen:
1) fitnes-klýbtar;
2) spa ortalyqtary;
3) saýnalar, basseinder;
4) kompiýterlik klýbtar (18 jasqa deiingi tulǵalardy qospaǵanda);
5) boýling klýbtary.
Bul rette Nur-Sultan, Almaty, Qaraǵandy qalalarynda pilottyq jobaǵa qatysatyn kásipkerlik sýbektileri kelesi sharttardyń oryndalýyn qamtamasyz etýi qajet:
- Jobaǵa qatysatyn kásipkerlik nysandaryna kelýshilerdi kirgizý kireberiste ornalasqan QR-kodty skanerlegen jaǵdaida ǵana iske asyrylady (kelýshiniń mártebesin aiqyndaý úshin)
- «jasyl» tústi mártebe - kelýshi derekter bazasynda covid-19-ǵa teris nátijemen PTR-testileýden ótken retinde belgilengen;
- «kók» tústi mártebe - PTR-testileý nátijesi joq, covid-19 juqtyrǵan naýqaspen bailanysta bolmaǵan;
- «sary» tústi mártebe - derekter bazasynda covid-19 juqtyrǵan naýqaspen bailanysta bolǵan;
- «qyzyl» tústi mártebe – derekter bazasynda covid-19 oń nátijesimen tirkelgen.
Kelýshide smartfon bolmaǵan jaǵdaida kásipkerlik obektisiniń qyzmetkeri kelýshiniń mártebesin onyń kelisimimen aqparattyq júiede tekseredi.
«Sary» (covid-19 juqtyrǵan naýqaspen bailanysta bolǵan), «qyzyl» (COVID-19-ǵa oń nátijesimen tirkelgen) mártebesine sáikes oqshaýlaýǵa jatatyn tulǵalar pilottyq jobaǵa qatysatyn kásipkerlik obektilerine kirýine jol berilmeidi.
