Álemniń 152 elinde 156 494 adamǵa koronavirýs juqqany anyqtaldy. Bul jaiynda QR Densaýlyq saqtaý ministrligi málim etti, dep habarlaidy "Ult aqparat".
Koronavirýstyń oshaǵy sanalǵan Qytaida virýstyń taralýy aitarlyqtai báseńdedi. Búgin bul elde bir táýlikte 20 oqiǵa tirkelgen. Jalpy, Qytaida 80 884 adam koronavirýs juqtyryp, onyń 3 199-y qaitys boldy. Statsionarlarda 10 734 naýqas em alyp jatsa, 66 911 adamnyń jazylǵany belgili. Al álemniń basqa elderinde 75 650 (krýiz lainerin qosa alǵanda) adam virýs juqtyryp, onyń 2 623-i qaza boldy.
1 «A» sanatyna jatqyzylǵan Italiiada bir táýlikte virýs juqtyrǵan 3 497 adam anyqtaldy. Virýs juqtyrǵandyǵy naqtylaǵan naýqastar sany - 21 157 adam, qaza tapqandar - 1 441. 1 «B» sanatyndaǵy Ispaniiada 6 391 adam virýs juqtyryp, 195 adam qaitys boldy. Bir táýlik ishinde koronavirýs juqtyrǵany rastalǵan adamdar sany - 1 159.
1 «A» sanatyna kiretin Iranda 12 729 adamǵa (bir táýlikte 1 365 adamǵa virýs juqqany anyqtaldy) virýs juǵyp, 611 adam mert boldy. Ońtústik Koreiada 8 086 adamnyń (bir táýlikte 107) koronavirýs juqtyrǵany anyqtaldy. Qaza bolǵandar - 72 adam.
Al 1 «B» sanatyna kiretin Frantsiiada osy ýaqytqa deiin 4 469 adamnyń virýs juqtyrǵany belgili. Osy táýlikte bul elde 808 adamǵa virýs juqqany rastaldy. Qaitys bolǵandar - 91 adam. Germaniiada táýlik ishinde 924 adamnan koronavirýs tabylyp, 9 adam qaza tapty. Jalpy, 4 599 adamnan koronavirýs tabylǵan.
