Nur-Sultan qalasynyń ákimdigi Memlekettik akademiialyq filarmoniiasynyń «Qorqyt» dástúrli saz toby úzilissiz 75 shyǵarma oryndap, Qazaqstannyń Ginness rekordtar kitabyna enýdi josparlap otyr, dep habarlaidy "Ult aqparat".
Filarmoniianyń baspasóz qyzmetinen málim etkendei, shara ulttyq ónerdi nasihattaý maqsatynda jáne Altyn Ordanyń 750 jyldyq mereitoiy qarsańynda ótkiziledi. Óner ujymy 17 aqpanda «Han Shatyr» saýda, oiyn-saýyq ortalyǵynda óner kórsetedi.
«Qorqyt» dástúrli saz tobynyń kórkemdik jetekshisi, Mádeniet qairatkeri Sholpan Qorǵanbek osyndai kontserttiń aqparattyq-entsiklopediialyq anyqtamalyqqa laiyq ekendigine senimdi: mýzykanttar Qazaqstanda alǵash ret non-stop rejiminde mýzykalyq shyǵarmalardy kidirissiz, bir demmen oinaidy.
«Qorqyt» dástúrli saz tobynyń quramyna qazaqtyń halyq aspaptarynda (qobyz, qylqobyz, dombyra, syrnai, múiiz syrnai, shańqobyz, jetigen, sherter, daýylpaz, saz syrnai, bas dombyra, sybyzǵy, sý aǵash, toqyldaq jáne t.b.) oinaityn talantty ónerpazdar jinalǵan. Ujymnyń biregeiligi - ondaǵy árbir ártistiń birneshe aspapty igerýi. Jastardy dástúrli án ónerine baýlý ártisterdiń jeke mýzykalyq stilin qalyptastyrýǵa, izdeýge talpyndyrady. Ujym repertýarynyń negizin Sholpan Qorǵanbektiń avtorlyq óńdeýinen ótken qazaq folklorynyń janrlary, iaǵni kúi, jyr, terme quraidy. Sheberlikpen óndelgen halyq mýzykasy ondaǵy beineler men sulýlyqty barynsha sýrettep, jańasha ún beredi.
«Qorqyt» dástúrli saz toby óz sheberligin úzdiksiz arttyrýǵa degen umtylysymen erekshelenedi. Ujym – aitýly respýblikalyq jáne halyqaralyq mýzykalyq baiqaýlar men festivalderdiń jeńimpazdary. Toptyń ujymdyq shyǵarmashylyǵy «Ǵasyrlar úni» II Óńiraralyq folklorlyq-etnografiialyq festivalinde, «Shabyt» HH halyqaralyq shyǵarmashyl jastar festivalinde, sondai-aq «Kóne Taraz kúmbiri» I Respýblikalyq etno-folklorlyq ansamblder festivalinde júldeli oryndardy ielenip keledi. Jaqynda ǵana «Qorqyt» Katardyń Doha qalasynda ótken «Cultural Diversity» halyqaralyq festivaline qatysty.
