Kórisý merekesinde úlkenderdi telefonmen, videoqońyraýmen quttyqtaǵan jón. Atyraý oblysynyń bas sanitar dárigeri Mádeniet Tanaýov turǵyndarǵa osyndai usynys jasady, dep habarlaidy "Ult aqparat".
«Atyraý oblysynda epidemiologiialyq ahýal áli turaqtalǵan joq. Osyǵan orai,turǵyndar áleýmettik araqashyqtyqty, meditsinalyq maska taǵý rejimin saqtaýy qajet.
Adamdar kóp jinalatyn jerge barmaý kerek. Ásirese, erteń, 14 naýryzda bastalatyn Kórisý merekesinde jasy úlken adamdardy telefonmen, videoqońyraý shalý arqyly quttyqtaǵan jón. Óitkeni, jasy úlken qariialar qaýipti virýs juqtyrý múmkindigi basym topqa jatady. Ondai adamdardyń kópshiliginde sozylmaly syrqaty bolýy múmkin. Sondyqtan, saqtyq sharalaryn saqtaǵanda ǵana qaýipti virýstyń taralýyna tosqaýyl qoiýǵa bolady» - deidi bas sanitar dáriger Mádeniet Tanaýov.
Onyń aitýynsha, óńir turǵyndary arasynda koronavirýs infektsiiasynyń tirkelýi toqtaǵan joq. Sol sebepten, árkim aldymen óziniń, aǵaiyn-týysynyń saýlyǵyn oilaǵany jón.
«Árine, ejelden kele jatqan Kórisý merekesinde úlkenderdi syilaý, olarǵa qurmet kórsetý sekildi qundylyqtardy joǵaltpaýymyz qajet-aq. Alaida, ár áýlettegi syily qariialardyń aman júrgenin qalaityn bolsaq, bul joly olarǵa arnaiy baryp, qol berip kórisýdi ázirge qoia turǵannyń sókettigi joq. Jasy úlken adamdar telefonmen, videoqońyraýmen quttyqtaǵandy túsinispikpen qabyldaidy dep oilaimyn. Qazirgi epidemiologiialyq ahýal bizdi osyndai qadamǵa barýǵa májbúr etip otyr», -dedi Mádeniet Tanaýov.
