Qazaqstan Respýblikasy Qorǵanys ministrligi men UQShU Ujymdyq bitimgershilik kúshter qolbasshylyǵy birlesken málimdeme jasady, dep habarlaidy QazAqparat.
Málimdeme mátini QR Qorǵanys ministrliginiń saitynda ornalastyryldy.
QR Qorǵanys ministri mindetin atqarýshynyń orynbasary Sultan Kamaletdinovtiń aitýynsha, Qazaqstan aýmaǵynda terrorizmge qarsy kúres sharalary jalǵasýda jáne olar lańkester tolyq joiylǵansha jalǵasady.
«Qazaqstan Respýblikasynyń aýmaǵynda jaǵdai turaqtalýda jáne bilik organdarynyń baqylaýynda.
UQShU ujymdyq bitimgershilik kúshteriniń qolbasshylyǵyna jáne jeke quramyna Qazaqstan halqyna kórsetken baýyrlastyq kómekteri úshin alǵys aitqym keledi.
Bitimgerlerdiń anaǵurlym mańyzdy obektilerdi kúzetke alýy, quqyq qorǵaý organdary men qarýly kúshterdiń terroristerge qarsy kúreske jiberilgen kúshteri men quraldarynyń edáýir bóligin bosatýǵa múmkindik berdi.
Qazirgi ýaqytta Qazaqstan Respýblikasynyń aýmaǵynda terrorǵa qarsy operatsiia jalǵasýda. Ol terroristerdi tolyq joiǵanǵa deiin júrgiziletin bolady», - dedi Sultan Kamaletdinov.
UQShU bitimgershilik kúshteriniń qolbasshysy Andrei Serdiýkov Almatyda demalysta nemese týystarynyń janynda júrgen Resei azamattaryn ushaqpen otanyna jiberý uiymdastyrylǵanyn málim etti.
«UQShU Ujymdyq qaýipsizdik keńesiniń sheshimine sáikes ujymdyq bitimgershilik kúshter Qazaqstan Respýblikasynyń aýmaǵynda ornalasýyn aiaqtady.
Qazirgi ýaqytta bitimgershilik kúshter bólimshesi mańyzdy memlekettik, áskeri jáne áleýmettik mańyzy bar obektilerdi qorǵaý jónindegi mindetterdi oryndaýda.
Áskeri kontingentterdi jedel ornalastyrý jáne qamtamasyz etý máselelerin jedel sheshkeni úshin Qazaqstan tarapyna rizashylyǵymdy bildiremin.
Resei Áskeri-ǵarysh kúshteri áskeri-kólik aviatsiiasynyń ushaqtary Resei Federatsiiasynyń aýmaǵyna oralýǵa niet bildirgen Almaty qalasynda demalysta nemese týystarynyń janynda júrgen Resei azamattaryn jiberýdi uiymdastyrdy.
Ujymdyq bitimgershilik kúshter bólimsheleriniń mindetterdi oryndaýy jaǵdai tolyq turaqtalǵanǵa deiin jalǵasatyn bolady», - dedi Andrei Serdiýkov.
