QR Qorǵanys ministrligi Qyrǵyzstandaǵy taýda joǵalyp ketken alpinisterdi izdestirý-qutqarý operatsiiasynyń qorytyndysyn habarlady.
"Áskeri alpinister toby tamyzdyń 19-y men 22-i aralyǵynda Tian-Shan jotasynyń Jeńis shyńy aýdanynda ótkizilgen izdestirý-qutqarý operatsiiasynan oraldy. Operatsiia jetekshisi aǵa leitenant Vasilii Pivtsov, kapitan Maqsut Jumaev pen maior Amanjol Rahmetov 15 tamyzda joǵalyp ketken Aleksandr Chechýlin, Murat Ótepbaev pen Andrei Korneevti izdestirýdi júrgizdi", - delingen taratylǵan habarlamada.
18 tamyzda keshke týysqandary joǵalyp ketkenderdi izdestirýde qoǵamnan kómek surady. Qorǵanys ministrliginiń qyzmetkerleri qazaqstandyqtardy izdestirýde jan-jaqty járdem kórsetý týraly sheshim qabyldady. Birneshe saǵat ishinde dabyl boiynsha Jeńis shyńynyń bazalyq lagerine ushý men izdestirý jumystaryna daiyndaldy.
Tańerteń 19 tamyzda áskeri alpinister Qarqara bazalyq lagerine keldi. Alaida, aýa raiy jaǵdaiy, jel men nashar kórinýshilik ushyp ótýge múmkindik bergen joq.
Ministrliktiń málimetinshe, 20 tamyzda qolaily aýa raiy bolǵan kezde komanda izdestirýdi bastady. Operatsiia ótkizilgen ýaqytta top zardap shekkenderdiń boljamdy ornalasýy aimaǵynda 5100-den bastap 6000 metrge deiingi biiktikte 14 ushyp ótýdi júzege asyrdy. Bókterge barynsha jaqyndaý 70 metrdi qurady. Jylý vizorlardan alynǵan aqparattyń taldaýy men kózben sholý nátije bergen joq. Tiri adamdardyń, máiit pen ózge de izderdiń bolý belgileri anyqtalǵan joq.
"Izdestirý Jeńis shyńyna shyǵý baǵdarynyń aýqymdylyǵymen kúrdelene tústi. Yqtimal ornalasý aimaǵy óte úlken. Izdestirý jumystary úshin aýa raiy qolaisyz edi. Tolassyz jaýyn-shashyn da izdestirý jumystary úshin qolaisyz boldy. Jaýyn-shashynnyń kóp bolýy 1,5 metrdegi bazalyq lagerde qar jamylǵysynyń biiktigin ulǵaita tústi, sondai-aq qar kóshkininiń qaýip-qaterin arttyrdy. Jaiaý toptyń jóneltilýi maqsatqa sáikes bolǵan joq", - dep habarlady ministrlikte.
Qolda bar málimet boiynsha qazaqstandyq alpinister komandasy (Murat Ótepbaev, Andrei Korneev, Aleksandr Chechýlin) 14 tamyzda Jeńis shyńyna shyqty. Sol kezde aýa raiynyń buzylýy bastaldy. Sońǵy ret top bailanysqa 15 tamyzda shamamen 6600-6900 metr biiktikten shyqty. Ótepbaev pen Korneev Aleksandr Chechýlinniń ókpesiniń isinýi nátijesinde qaza bolǵany týraly habarlady. Odan basqa, palatkalar, kerek-jaraq pen azyq-túlikti jel aidap áketti. Olar qolaisyz aýa raiynyń ashylýyn kútý úshin qarly shuńqyr qazdy.
18 tamyzda «Aksai Trevel» (Qyrǵyzstan) týristik kompaniiasynyń Mi-8 tikushaǵy izdestirýge shyqty. Izdestirý nátije bergen joq. Taýda birneshe qar kóshkini boldy.
Joǵalyp ketken alpinister týraly anyqtama:
Ótepbaev Murat Mataiuly - 1970 j.t., alpinizmnen SShK, 3-sanatty nusqaýshy, Qar qabylany No596 (2012 j.). 5-shi jáne odan joǵary sanatta 15 márte jáne jeti myńdyqqa, onyń ishinde, Jeńis shyńyn (7439 m) 11 ret baǵyndyrdy. Izdestirý jáne qutqarý jumystaryna qatysty.
Korneev Andrei Sergeevich - 1977 j.t., alpinizmnen 1-razriad (SShK normativtin oryndaǵanǵa deiin 6A kúrdeliliktegi bir ret shyńdy baǵyndyrý qaldy). Jeti myńdyqqa onyń ishinde, Jeńis shyńyna 12 márte jáne Han Táńiri shyńyna 6 ret shyqty. Qutqarý jumystaryna birneshe ret qatysty.
Chechýlin Aleksandr Borisovich - 1961 j.t., alpinizmnen SShK, alpinizmnen bapker nusqaýshy, Qar qabylany № 577 (2011 j.). 5-shi jáne odan joǵary sanatta 15 márte, onyń ishinde, 14 ret jeti myńdyqqa, Jeńis shyńyna (7439 m) shyqty. Izdestirý jáne qutqarý jumystaryna qatysyp, basqardy.
Aita keteiik, «Qar qabylany» ataǵy TMD-nyń barlyq jeti myńdyqtaryn baǵyndyrǵany úshin beriledi.
