Prezident Qasym-Jomart Toqaev qorǵanys ministri Rýslan Jaqsylyqovty qabyldady, - dep habarlaidy "Ult aqparat" Aqordaǵa silteme jasap.
Memleket basshysy – Qazaqstan Qarýly Kúshteriniń Joǵarǵy Bas qolbasshysyna Qorǵanys ministrliginiń biylǵy birinshi jartyjyldyqta atqarǵan jumystarynyń qorytyndysy jóninde esep berildi.
Rýslan Jaqsylyqov Qasym-Jomart Toqaevqa armiia bólimsheleriniń jaýyngerlik ázirligi jóninde baiandady. Qazirgi ýaqytta negizgi kúsh-jiger basqarý organdary men jeke quramdy daǵdarys jaǵdaiy kezinde tiimdi áreket etýge, ortalyq jáne jergilikti bilik organdarymen aradaǵy is-qimyldardy úilestirýge oqytý máselesine baǵyttalǵan.
Prezidentke jaýyngerlik daiyndyqty qamtamasyz etý jónindegi, sonyń ishinde birqatar aýqymdy oqý-jattyǵý jiynyna qatysty ekinshi jartyjyldyqqa josparlanǵan sharalar týraly málimet berildi. Sonymen qatar elimizdiń sarbazdary halyqaralyq áskeri oiyndarǵa qatysady.
Qorǵanys ministri Arnaýly operatsiialarǵa qatysatyn kúshterdi damytý, oq-dárilerdiń qaýipsiz saqtalýyn qamtamasyz etý, otandyq qorǵanys-ónerkásip kesheniniń áleýetin paidalana otyryp, armiiany zamanaýi qarý-jaraqpen jáne áskeri tehnika túrlerimen jabdyqtaý, áskeri infraqurylymdy jetildirý jónindegi Prezident tapsyrmalarynyń oryndalý barysy týraly esep berdi. Sondai-aq kezdesýde sarbazdardyń qaýipsizdigin qamtamasyz etýge jáne áskeri qyzmetshiler arasynda álimjettik áreketterdi boldyrmaý máselesine erekshe nazar aýdaryldy.
Kezdesý sońynda Prezident Qarýly Kúshterdi keshendi ári júieli túrde jetildirýdi qamtamasyz etý jáne olardyń jaýyngerlik daiyndyǵyn joǵary deńgeide ustap turý qajettigin atap ótti. Memleket basshysy elimizdiń qorǵanys qabiletin odan ary arttyrýǵa baǵyttalǵan birqatar tapsyrma berdi.
