Birikken Arab Ámirlikteriniń astanasy Ábý-Dabide qorǵanys vedomstvosynyń basshysy general-polkovnik Rýslan Jaqsylyqov bastaǵan Qazaqstannyń áskeri delegatsiiasy kelissózder júrgizip, qorǵanys-ónerkásip keshenderi kásiporyndarynyń ónimderimen tanysty. Bul týraly QR Qorǵanys Ministrliginiń baspasóz qyzmetinen habarlaidy.
Sapar aiasynda BAÁ vitse-prezident Mansýr ibn Zaid Ál Nahaianmen hattamalyq kezdesý ótti. Onda qorǵanys salasyndaǵy ekijaqty ózara is-qimyldyń perspektivalary talqylandy.
Sonymen qatar Armiia úiinde general-polkovnik Rýslan Jaqsylyqov pen qorǵanys isteri jónindegi memlekettik ministr Muhammed ben Múbarak Fadel ál-Mazrýi ózara múddeli yntymaqtastyq baǵyttaryn talqylady.
BAÁ qorǵanys-ónerkásip kesheni kásiporyndarynyń qyzmetimen tanysý maqsatynda qazaqstandyq delegatsiia Tawazun Industrial park indýstriialyq parkinde boldy. Onda áskeri maqsattaǵy ónimder shyǵaratyn «Nimr», «Karakal», «Halkon» jáne «Adasi» kompaniialary jumys isteidi.
Áskeri qyzmetshiler áskeri tehnika men qarý-jaraqtyń taktikalyq-tehnikalyq sipattamalaryn zerdeledi. Olardyń qataryna jaýyngerlik saýytty mashinalar, atys qarýy, joǵary dáldiktegi basqarylatyn jáne túzetiletin aviatsiialyq bomba, tikushaq tipti ushqyshsyz ushý apparattary jáne joǵary qashyqtyqtaǵy tosqaýyldaýshy oq-dáriler kiredi.
Bul Qazaqstan tarihyndaǵy Qorǵanys ministriniń Birikken Arab Ámirlikterine alǵashqy resmi sapary ekenin aita ketý kerek.
Fotolar: QR Qorǵanys Ministrliginiń baspasóz qyzmetinen
