Qorǵanys vedomstvosynyń basshysy Almaty jáne Jambyl oblystaryna jumys saparymen barady, dep habarlaidy "Ult aqparat" vedomstvonyń baspasóz qyzmetine silteme jasap.
General-leitenant Nurlan Ermekbaev Tilendiev kentindegi bitimgershilik daiarlyq oqý-jattyǵýy ortalyǵynda kezekti bitimgerler kontingenti quramynda Livanǵa ketip bara jatqan áskeri qyzmetshilermen kezdesti.
Qorǵanys ministri jaýyngerlerge arnaǵan sózinde Qazaqstannyń qaýipsizdik, yntymaqtastyq jáne damý salasyndaǵy senimdi áriptes retinde alatyn ornyn nyǵaitý úshin áskeri qyzmetshilerimizdiń bitimgershilik missiialarǵa qatysýynyń mańyzdy ekenin atap ótti.
«Búgin sizder úshin de, jalpy Qarýly Kúshter úshin de erekshe kún. Uzaq daiyndyq pen muqiiat irikteýden keiin sizder missiiany oryndaý úshin úlken jolǵa attanasyzdar. Missiia mol tájiribe jinaqtap, jaýyngerlik áleýetti nyǵaitýǵa múmkindik beredi» – dep atap ótti general-leitenant Nurlan Ermekbaev.
Qorǵanys vedomstvosynyń basshysy bitimgerlerge jaýyngerlik joldastyqty joǵary qoia otyryp, bir-birine qoldaý kórsetýmen missiiany sátti oryndap, úilerine aman-esen oralýyna tilektestik bildirdi.
Qazaqstannyń Livandaǵy bitimgershilik missiiasy 2018 jyly qazan aiynda bastalǵany esterińizde bolar. Qazirgi ýaqytta onda Úndistan batalonynyń quramynda tórtinshi qazaqstandyq bitimgershilik rota missiiasyn aiaqtaýda.
Qorǵanys ministri jumys sapary barysynda Almaty jáne Gvardeisk garnizondarynyń áskeri bólimderin aralaýdy josparlaýda.
