Qorǵaljyn qoryǵynda 154 kiikti atqandardyń isine eki qoryqshynyń qatysy bolǵan, dep habarlaidy "Ult aqparat" IIM baspasóz qyzmetine silteme jasap.
«Politseiler brakonerler tobynyń Qorǵaljyn qoryǵyndaǵy 154 aqbókendi atý áreketine qatysy baryn dáleldedi. Qylmys naýryz aiynda tirkelgen bolatyn. «Qorǵaljyn memlekettik tabiǵi qoryǵy» RMQK direktorynyń politsiiaǵa habarlaǵanyndai, 17 naýryzda qoryq aýmaǵynyń ishinde múiizi kesilgen 154 óli aqbóken tabyldy. Memleketke 1 mlrd 435 mln-nan astam teńge shyǵyn keltirilgen», delingen habarlamada.
Baspasóz qyzmetiniń málimetinshe, aqbókendi atýǵa qatysty QR QK-niń 337-babynyń 5-bóligi (zańsyz ań aýlaý) boiynsha sotqa deiingi tergeý qolǵa alyndy.
«Qylmysqa sirek kezdesetin jáne joiylý aldynda turǵan ań túrleri men aqbókenderdi qorǵaýǵa mindetti «Ohotzooprom» RMQK óńirlik filialynyń qyzmetkerleriniń qatysy bary anyqtaldy. Tergeý barysynda kásiporynnyń eki qyzmetkeri kedergisiz atýdy uiymdastyrǵan jáne olardyń eki tanysy aqbókenderdi atqany anyqtaldy.
Sondai-aq tártip saqshylary janýarlardyń múiizin satyp alǵan adamdy anyqtady, ol Nur-Sultan qalasynyń turǵyny bolyp shyqty. Onyń garajynan Ressei Federatsiiasy aýmaǵyna kontrabandalyq jolmen tasymaldaý jáne odan ári QHR-ǵa satý úshin daiyndalǵan, aramen kesip alynǵan aqbókenderdiń múiizi tabylyp, tárkilendi», delingen habarlamada.
Brakonerlerge QR QK-niń 339-baby (ósimdikterdiń nemese janýarlardyń sirek kezdesetin jáne quryp ketý qaýpi tóngen, sondai-aq paidalanýǵa tyiym salynǵan túrlerimen, olardyń bólikterimen nemese derivattarymen zańsyz ainalysý) boiynsha aiyp taǵyldy. Qylmystyq is sotqa jiberilgen.
