Koreia Respblikasynan Qazaqstanǵa keletin týristerdiń sany artyp keledi, dep habarlaidy "Ult aqparat" «Kazakh Tourism» ulttyq kompaniiasynyń baspasóz qyzmetine silteme jasap.
QR Ulttyq ekonomika ministrligi Statistika komitetiniń málimeti boiynsha, Qazaqstan men Koreia arasynda kórsetkishterdiń turaqty ósimi baiqalady.
«Atap aitqanda, Qazaqstanǵa Koreiadan keletin týristerdiń sany 2018 jyly 15 paiyzdyq ósimdi kórsetti (2017 jylǵy kórsetkishpen salystyrǵanda). Naqtyraq aitqanda, byltyr ol memleketten elimizge 35 135 adam kelgen. Qazaqstannan Koreiaǵa baratyn týristerdiń de sany artýda. Máselen, 2018 jyly Qazaqstannan Koreiaǵa 46 899 adam barǵan», - delingen kompaniianyń habarlamasynda.
Ótken jyly Koreia Respýblikasy kóshpeli týrizmge 30,6 mln dollar aqsha bólip, týristik salaǵa jumsaǵan bul shyǵyn boiynsha álemde toǵyzynshy orynnan kóringen.
«Ár jyldyń qyrkúiek nemese qazan ailarynda Koreiada Chýsok (Chuseok, uzaqtyǵy 3 kún) merekesi toilanady. Al qysqy ýaqytta kanikýldar ol elde jeltoqsan nemese qańtar aiyna dóp keledi. Ai kúntizbesi boiynsha Koreiada jańa jyl aqpan aiynda atalyp ótedi. Mine, dál osy ýaqytta Koreiadan shyǵatyn týristerdiń sany artady», - delingen habarlamada.
Koreialyqtar kóbinese Qazaqstannyń golf-týrlaryna qyzyǵady eken. Sebebi, golf sporty ol elde aitarlyqtai damyǵan. Koreia eliniń azamattary, sondai-aq Sharyn shatqalyn, Kólsaidy, Qaiyńdyny kórgisi keledi. Ekinshiden, shańǵy tebýge de qyzyǵýshylyqtary erekshe.
«6-9 maýsym kúnderi Mádeniet jáne sport ministrliginiń týrizm indýstriiasy Seýldegi SITIF 2019 (Seoul International Tourism Industry Fair 2019) kórmesinde otandyq úsh operatordyń kómegimen qazaqstandyq stendti pash etti. Qazaqstandyq stend qonaqtary qurttan kokteil ázirleýdi úirenedi. Sonymen birge, qazaqstandyq týroperatorlar áleýetti klienttermen V2V kezdesýlerin ótkizýde», - dep habarlady ulttyq kompaniiadan.
Biyl Seýl qalasy men Korea World Travel Fair kompaniiasynyń ákimshiligi birlese otyryp Seoul International Tourism Industry Fair kórmesin ótkizip jatyr. Kórmege álemniń 50 elinen 1400-ge tarta uiym men týristik kompaniialardyń ókilderi qatysýda.
