27 qarashada Qazaqstan Respýblikasynyń Ulttyq mýzeii SIMA zamanaýi óner murajaiynda (Ońtústik Koreia, Sývon) «Eýraziialyq ýtopiia: Post Scriptum» atty kórmesin ashty.
Kórme SIMA murajaiymen birlesip uiymdastyrylǵan. Ekspozitsiiada keńestik jáne qazirgi zamannyń 57 sýretshisiniń 100-den astam týyndysy bar. Kórme - FOKÝS QAZAQSTAN halyqaralyq jobasy aiasynda ótken sheteldik is-sharalardyń tórtinshi ári sońǵysy.
FOKÝS QAZAQSTAN Rýhani jańǵyrý baǵdarlamasy aiasynda júzege asyp jatqan «Zamanaýi qazaqstandyq mádeniet - jahandyq álemde» atty arnaiy jobasynyń bir bóligi sanalady.
FOKÝS QAZAQSTAN jobasynyń kýratory Roza Ábenovanyń aitýynsha, joba halyqaralyq arenadaǵy Qazaqstannyń zamanaýi beineleý ónerin aýqymdy kórsete alǵan uiymdastyrý tájiribesiniń alǵashqy jáne tabysty mysaly bola alady. 4 qalada (London, Berlin, Djersi Siti, Sývon) 400-ge jýyq jumys jáne 94 sýretshiniń muraǵattyq qujattary kórsetildi. Jobanyń sońynda ár kórme boiynsha katalogtar shyǵarylady.
«Eýraziialyq ýtopiia: Post Scriptum» kórmesi keńestik kezeńniń jáne qazirgi zamanǵy sýretshilerdiń shyǵarmashylyǵyn zerdeleý, kórkemdik dástúrdiń jalǵasy men úzilýin kórsetý, respýblikamyzdyń táýelsizdigi kezeńindegi qazirgi zamanǵy ónerdiń dúniege kelýin, jańa diskýrstar men medianyń paida bolýyn zertteý arqyly qazaqstandyq ónerdiń narrativin anyqtaýǵa tyrysady. Ulttyq sýret óneri mektebiniń erekshelikteri, «jergilikti modernizm» fenomeni jáne táýelsizdik kezeńindegi óner – osy kórmeniń basty taqyryptary. Kórmede Úki Ájievtiń, Olga Kýjelenkonyń, Salihitdin Aitbaevtyń, Jańatai Shárdenovtiń, Evgenii Sidorkinniń, Aleksei Stepanovtyń, Mihail Kimniń, Boris Paktyń, Ábdirashit Sydyhanovtyń, Rýstam Halfinniń, Sergei Maslovtyń, Sáken Narynovtyń, Serikbai Áljanovtyń, Erbosyn Meldibekovtyń, Elena men Viktor Vorobevtardyń, Aleksandr Ýgaidyń, Baqyt Búbiqanovtyń, Álibek Mergenovtiń, Sáýle Dúisenbinanyń, Nurbol Nurahmettiń jáne basqalarynyń shyǵarmalary usynyldy.
«Eýraziialyq ýtopiia: Post Scriptum» kórmesiniń jetekshileri: Sorokina Iýliia (Qazaqstan), Shin Yn Iang (Ońtústik Koreia). Iýliia Sorokina jergilikti modernizm fenomenin, sýretshilerdiń modernizm murasyn sezinýi men onyń óz tájiribelerimen ushtastyrýyn atap kórsetedi. Shin Yn Iangtiń aitýynsha, «Qazaqstan Koreiamen tarihi turǵydan tyǵyz bailanysqan, biraq, biz Qazaqstannyń óneri men mádenieti týraly tym az bilemiz. Qazaqstan óneriniń alǵashqy kórmesiniń arqasynda bizdiń ol týraly kóbirek bilýimizge múmkindik týdy».
FOKÝS Qazaqstan jobasyn QR Ulttyq mýzeii men QR Mádeniet jáne sport ministrligi uiymdastyrdy.
Kórme 2019 jyldyń 3 naýryzyna deiin jalǵasady.
