Mádenietter men dinderdiń halyqaralyq ortalyǵynyń direktory Aidar Ábýov Qordai aýdanynda bolǵan oqiǵa týraly pikir bildirdi, dep habarlaidy QazAqparat.
«Bul – búkil qoǵamdy dúrliktirgen oqiǵa. Men eki ultty da kinálaýǵa qarsymyn. Munyń bári aldyn alý sharalary tiisti dárejede júrgizilmegendikten boldy dep oilaimyn. Qazirgi ýaqytta memleket ákimdi jáne birqatar laýazymdy tulǵalardy aýystyrdy, basqa da sharalar qoldanyp jatyr», - deidi QR UǴA qurmetti akademigi, filosofiia ǵylymdarynyń doktory Aidar Ábýov.
Ol mundai jaǵdailardyń qalai aldyn alýǵa bolatynyn aitty.
«QR Prezidentiniń janyndaǵy Memlekettik basqarý akademiiasynda jańadan taǵaiyndalǵan ákimderge sheshimi tabylmaǵan áleýmettik máselelerdiń, qaqtyǵystardyń aldyn alý joldaryn úiretý kerek. Jumyssyz adamdardy jumyspen qamtamasyz etýdiń bir joly – Soltústik Qazaqstan aimaǵyna jiberip, jumyspen qamtý. Arys, Túrkistan jáne basqa da qurylys jumystary qarqyndy júrip jatqan aimaqtarǵa brigadamen jiberý qajet», - deidi ol.
Eske sala keteiik, 7 aqpanda Jambyl oblysy Qordai aýdanyndaǵy Masanchi aýylynyń turǵyndary arasynda jappai tóbeles boldy. Kóp ótpei Prezident Qasym-Jomart Toqaev Jambyl oblysy Qordai aýdanynda bolǵan jappai tóbeleske qatysty pikir bildirdi.
«Jambyl oblysy Qordai aýdanynda buzaqylyq sipattaǵy jappai tóbeles boldy. Ony arandatýshylar óz paidasyna qoldanbaq bolǵan. Politsiia jaǵdaidy rettep, óz baqylaýyna aldy. Qoǵamdyq tártipti buzǵandar jaýapkershilikke tartylady» dep jazdy Qasym-Jomart Toqaev Twitter paraqshasynda.
8 aqpanda Memleket basshysy Jambyl oblysyndaǵy oqiǵaǵa bailanysty málimdeme jasady.
Arnaiy Úkimet komissiiasy qurylyp, Jambyl oblysyna bardy. Al Ishki ister ministrligi Qordaidaǵy qaqtyǵystan 10 adamnyń kóz jumǵanyn rastady.
