2021 jyly bankterge brokerlik qyzmet kórsetý quqyǵy beriledi. Bul týraly QR Qarjy naryǵyn retteý jáne damytý agenttiginiń tóraǵasy Mádina Ábilqasymova aityp berdi, dep habarlaidy QazAqparat.
«Sońǵy bes jylda qor naryǵyn kapitaldandyrý 47,3 trln teńgege jetip, úsh eseden astyn. Bul JIÓ-niń 61%-yn quraidy. 2021 jyly qor naryǵy infraqurylymyn jańǵyrtý nátijesinde MSCI jáne FTSE Russel halyqaralyq indeksterinde Qazaqstan Emerging Markets MSCI sanaty úshin negizgi sapalyq ólshemsharttarǵa jáne Secondary Emerging Markets FTSE Russel kriteriilerine tolyq sáikes keldi», - dedi M. Ábilqasymova Qazaqstan qarjygerleriniń IX Kongresinde.
Onyń aitýynsha, qor naryǵyndaǵy basty protsess jeke investorlar belsendiliginiń artýy boldy. 2020 jyly qashyqtan identifikatsiialaýdy engizý arqyly qor naryǵynda jeke tulǵalardyń sany 203 myńǵa deiin ulǵaidy.
«2021 jyly bankterge brokerlik qyzmetterdiń tolyq aiasyn usyný quqyǵyn bere otyryp, biz osy segmentte odan ári ósýdi kútemiz. Jeke investorlar sanynyń artýymen birge biz olardyń quqyqtary men múddelerin qorǵaý tetikterin jaqsartý qajettiligine tap boldyq. Osyǵan bailanysty retteý aiasyna qarjy deldaldary engiziledi. Investitsiialyq usynymdardyń sapasy úshin jaýapkershilik aiqyndaldy, investorlardyń táýekel beiinin aiqyndaý boiynsha tásilder ózgertildi», - dedi spiker.
M. Ábilqasymova ujymdyq investitsiialardy retteý bóliginde birjaǵa táýekeldi investitsiialaý qorlaryn jiberýge shekteýler alynǵanyn atap ótti. Qabyldanǵan sharalar investitsiialyq qorlar aktivteriniń jyl basynan beri 47%-ǵa 627 mlrd teńgege deiin ósýine alyp keldi.
«Jańa emitentterdiń naryqqa shyǵýyn yntalandyrý úshin ruqsat berý rásimderin ońtailandyrý jáne qysqartý arqyly olardyń qoljetimdiligi jeńildetildi. Jeke ornalastyrýǵa arnalǵan obligatsiialardy, investitsiialyq obligatsiialardy, kliringtik qatysý sertifikattaryn qosa alǵanda, qazaqstandyq emitentter úshin qoljetimdi qarjy quraldarynyń jelisi keńeitildi», - dedi M. Ábilqasymova.
